U budynku carkvy «Novaje žyćcio» adbyłasia pres‑kanferencyja, pryśviečanaja Kampanii pa abaronie pravoŭ na svabodu sumleńnia. Prysutničali pastary pratestanckich cerkvaŭ, pravasłaŭny śviatar a. Šramko dy sustaršynia arhkamitetu «Biełaruskaj chryścijanskaj demakratyi» Alaksiej Šein.
Admoŭnych momantaŭ ŭ zakonie bolš, čym pazytyŭnych, vykazaŭ svajo mierkavańnie na pres‑kanferencyi śviatar Śviata‑Pakroŭskaj carkvy ŭ Miensku a. Alaksandar Šramko.
Na jaho dumku, zakon zahaniaje relihijnyja hramady ŭ hieta, izaluje cerkvy ad hramadztva. Jon pryznaŭ, što daloka nia ŭsie pravasłaŭnyja cerkvy adčuvajuć na sabie cisk dziaržavy. Adnak śviatar źviarnuŭ uvahu na toje, što najčaściej zakon abmiažoŭvaje cerkvy, jakija aktyŭna raźvivajucca, žadajuć zajmacca misijanerskaj dziejnaściu dy pašyrać svoj upłyŭ u hramadztvie.
Pravasłaŭny śviatar adznačyŭ, što ŭsie damovy Pravasłaŭnaj carkvy ab supracoŭnictvie ź ministerstvami adukacyi dy abarony zastalisia na papiery. Nia lepšyja spravy i ź niadzielnymi škołkami, a taksama z mahčymaściu źbiracca dla čytańnia Biblii dy supolnych malitvaŭ va ŭłasnych damach, padkreśliŭ Alaksandar Šramko.
Usie ŭdzielniki pres‑kanferencyi padkreślivali, što Kampanija pa abaronie pravoŭ na svabodu sumleńnia nia nosić relihijnaha charaktaru, a jość hramadzkaj akcyjaj. U časie zboru podpisaŭ, jaki praciahniecca da kanca traŭnia, planujecca aznajomić z akcyjaj jak minimum 300‑500 tysiač čałaviek.
