Ministerstva finansaŭ Biełarusi da kanca 2012 hoda ažyćciavić raźmiaščeńnie dziaržaŭnych valutnych ablihacyj siarod nasielnictva. Pra heta paviedamiŭ namieśnik ministra finansaŭ Maksim Jermałovič.
«Heta budzie nievialikaja suma. My płanujem pryciahnuć da 50 młn. dołaraŭ za košt emisii ablihacyj dla fizičnych asob, naminavanych u valucie», — raskazaŭ jon. Pavodle słoŭ Jermałoviča, vypusk valutnych ablihacyj dla nasielnictva budzie alternatyvaj bankaŭskim depazitam. «Heta značyć — novy instrumient dla źbieražeńniaŭ nasielnictva», — adznačyŭ čynoŭnik.
Pry hetym namieśnik ministra padkreśliŭ, što heta nie źjaŭlajecca značnaj krynicaj pastupleńniaŭ u kaznu dziaržavy. «50 młn. dołaraŭ dla ahulnaj finansavaj karciny, dla stratehii kiravańnia doŭham ničoha nie dajuć.
Ale dla nasielnictva heta alternatyŭny varyjant układańniaŭ. U nasielnictva źjaŭlajecca bolš šyroki instrumientaryj dla źbieražeńniaŭ naroŭni z bankaŭskimi depazitami i IPO», —kanstatavaŭ Jermałovič.
Pavodle jaho słoŭ,
uzrovień dachodnaści pa valutnych ablihacyjach dla nasielnictva budzie vyznačacca popytam i prapanovaj. Minfin maje namier aryjentavacca na tuju dachodnaść, jakaja siońnia pradastaŭlajecca valutnymi ablihacyjami dla jurydyčnych asob (7,5%.).«Moža być, krychu nižej, ale ŭsio budzie zaležać ad popytu i prapanovy», — udakładniŭ namieśnik ministra. U lubym vypadku, upeŭnieny jon, heta budzie dosyć pryvabny instrumient dla inviestavańnia.
Namieśnik ministra finansaŭ taksama nie vyklučyŭ novych vypuskaŭ valutnych ablihacyj dla jurydyčnych asob.
Nahadajem, pačynajučy z 5 kastryčnika hetaha hoda i pa siońniašni dzień Minfin Biełarusi raźmiaściŭ siarod jurydyčnych asob — rezidentaŭ čatyry vypuski doŭhaterminovych valutnych ablihacyj na ahulnuju sumu 218 młn. dołaraŭ ZŠA (dva vypuski pa 100 młn. dołaraŭ, adzin — na 10 młn. dołaraŭ i jašče adzin — na 8 młn. dołaraŭ).
