Za piać dzion u Minsku sabrana prykładna 3,5 tysiačy podpisaŭ za ŭniasieńnie źmianieńniaŭ u zakon «Ab svabodzie sumleńnia i relihijnych arhanizacyjach». Pra heta ŭ intervju BiełaPAN paviedamiŭ juryst minskaj carkvy «Novaje Žyćcio» Abjadnańnia abščyn chryścijan poŭnaha Jevanhiella ŭ Respublicy Biełaruś Siarhiej Łukanin.
Pavodle jaho słoŭ, pakul nie pastupili źviestki z rehijonaŭ ab chodzie kampanii, jakaja pačałasia 22 krasavika. «Adnak my možam kanstatavać, što kampanija idzie aktyŭna, bo pastar adnoj z cerkvaŭ našaha abjadnańnia ŭ Baranavičach (Bresckaja vobłaść) na dniach byŭ zaprošany da namieśnika staršyni harvykankama pa ideałohii», — paviedamiŭ juryst.
Pavodle jaho słoŭ, arhanizatary kampanii raźličvajuć sabrać nie mienš za 50 tysiač podpisaŭ pad adkrytym zvarotam da kiraŭnika dziaržavy, da Kanstytucyjnaha suda, Pałaty pradstaŭnikoŭ Nacyjanalnaha schodu z zaklikam pryvieści ŭ adpaviednaść z Kanstytucyjaj Respubliki Biełaruś zakon «Ab svabodzie sumleńnia i relihijnych arhanizacyjach», što dziejničaje z kanca 2002 hoda.
Jak zaznačyŭ S.Łukanin, da kampanii padklučajucca roznyja denaminacyi chryścijanstva, u tym liku pratestanty, katoliki i pravasłaŭnyja. «Tak, na pres‑kanfierencyi, praviedzienaj inicyjatarami kampanii ŭ stalicy 25 krasavika, pravasłaŭny śviatar Śviata‑Pakroŭskaj carkvy ajciec Alaksandr Šramko (Minsk) padkreśliŭ, što chryścijanie pazbaŭleny zakonnaj mahčymaści źbiracca pa damach dla čytańnia Biblii i malitvaŭ, a taksama sutyknulisia ź vialikimi pieraškodami ŭ dziejnaści niadzielnych škoł. Pavodle jaho słoŭ, zakon abmiažoŭvaje dziejnaść najbolš aktyŭnych pravasłaŭnych prychodaŭ, jakija chočuć zajmacca misijanierskaj dziejnaściu i pašyrać svoj upłyŭ u hramadstvie, — skazaŭ S.Łukanin. — Na dumku ž jepiskapa našaha abjadnańnia Viačasłava Hančarenki, hałoŭnym kryteryjem dabrabytu hramadstva źjaŭlajecca jaho maralnaść. Jepiskap upeŭnieny, što kali carkva, skavanaja pałažeńniami dziejnaha zakanadaŭstva, akazvaje niedastatkovy ŭpłyŭ na maralnaść hramadstva, heta pryvodzić da jaho dehradacyi».
