U internecie tryvaje prajekt «Mur». Jaho aŭtary prapanujuć supolnymi namahańniami razburyć virtualnuju ścianu pa abrysu Biełarusi, jakaja mieścicca na sajcie murproject.org. Kab vyniać z muru svaju «cahlinu», treba «kliknuć» pa im kursoram. Pakul «razburana» krychu bolej za 11 000 «cahlin». Vyniaŭšy «cahlinku», možna pabačyć novy klip hurtu «Krama». Varaškievič i Ka specyjalna dla hetaha prajektu zapisali biełaruski kaver na znakamituju pieśniu «Pink Floyd» «The Wall». Miž tym, klip na «Mur» užo razychodzicca pa internecie — rolik źjaviŭsia na videaservisach video.google.pl i youtube.com.
Heta ŭžo treci biełaruski kaver na hety tvor — raniej svaje versii prapanavała rasiejskaja hrupa «Komba Bakch» i laŭreat apošniaha «Basovišča» — hurt «Parason».
«My žadajem, kab internet‑supolnaść zaŭvažyła, što vandroŭki pa sajtach u siecivie mohuć być nia tolki zabavaj, ale i častkaj udziełu ŭ važnaj hramadzkaj dziejnaści. My chočam pieradać asnoŭnuju infarmacyju pra prablemy z demakratyjaj u Biełarusi i adnačasova pakazać jakim čynam možna (navat nia žyvučy u Biełarusi) padtrymać dziejnaść na karyść vyrašeńnia hetych prablemaŭ. My chočam kab internetavaja aktyŭnaść stałasia pieršym krokam da hramadzianskaje aktyŭnaści ŭ realnym śviecie», — kažuć u zvarocie inicyjataraŭ prajektu z supołki Homo Faber.
