Tolki što mieŭ hutarku ź Mikołam Statkievičam. Jon pryjšoŭ u ofis kampanii BiełaPAN, kab uziać udzieł u anłajnavaj kanferencyi, zładžanaj internet-hazetaj "Biełaruskija naviny".
U palityzavanaj publiki zaraz na jazyku, kaniešnie, kanhres, što raspačniecca zaŭtra. I ja pačaŭ z pytańnia:
— Jaki sa scenaroŭ kanhresu vy paličyli b aptymistyčnym?
— Samym aptymistyčnym byŭ by varyjant, kab mianie vypuścili na tydzień paźniej, — śmiejučysia, adkazaŭ Statkievič. Patłumačyŭ: bo zaraz i praihnaravać toje mierapryjemstva nie vypadaje, i tam — misija niaŭdziačnaja, pakolki 85-90% jahonych udzielnikaŭ — "publika anhažavanaja".
Zaraz partyjnyja lidery, badaj, marakujuć, jak neŭtralizavać dvuch byłych "chimikaŭ" — Statkieviča i Sieviarynca. Hetyja dvoje peŭna ž uniasuć dolu ekstrymu ŭ chadu mierapryjemstva, na jakim mierkavałasia praštampavać biezalternatyŭnyja prajekty stratehii, małoj kanstytucyi dy ekanamičnaje platformy.
Ale Statkievič, jak viadoma, raspracavaŭ alternatyŭnuju stratehiju. "Zrabiŭ chutka, tydni za dva, bo ŭsio było ŭ hałavie", — kaža jon mnie. Paviedamiŭ taksama, što jahonyja prychilniki sprabavali prasunuć dakument ad imia Eŭrapiejskaj kaalicyi na rehijanalnych kanferencyjach, ale ŭsio było jak harocham ab ścianu.
Na kanhresie spadar Mikoła maje namier pazmahacca za svaju stratehiju. "Hałoŭnaje — damahčysia pastanoŭki na hałasavańnie, — kaža jon. — Cikava pabačyć, jak Labiedźka ź Viačorkam (kamunistaŭ tut u raźlik nie biarem) buduć hałasavać suprać eŭrapiejskaha vybaru".
Na dumku Statkieviča, tytulnaja apazycyja "stomlenaja". Paradaksalna, ale jana, jak i ŭłada, prahnie stabilnaści, "najpierš resursavaj". I na kanhresie "daśviedčanyja biurakraty" pasprabujuć zaćvierdzić kamfortnyja dla stomlenych apazycyjnych viarchoŭ rašeńni. Varta čakać "najezdu" na Milinkieviča, prychilniki jakoha nia majuć balšyni, prahnazuje Statkievič.
Razam z tym, jon pierakanany: ułada moža evalucyjanavać chiba ŭ bok zakručvańnia šrubak. Tamu apazycyi treba ŭzbrojvacca mocnaj stratehijaj, a nie čakać z mora pahody: voś naviersie ŭśviadomiać, što "tak žyć nielha", dy pakličuć nas za kruhły stoł...
Što da supracy ź Milinkievičam, to spadar Mikoła skazaŭ tak: u ruch "Za svabodu!" Eŭrapejskaja kaalicyja ŭvachodzić nia budzie, ale abjadnać namahańni całkam možna ŭ rečyščy mierkavanaj šyrokaj kampanii pad pracoŭnaj nazvaj "My — eŭrapiejcy!".
Uvohule ž, sa słoŭ Statkieviča, kaalicyja paśla kanhresu farmalna, badaj, nie raspadziecca. Adnak mohuć sfarmavacca dva vyraznyja centry: umoŭna kažučy, prarasiejski i praeŭrapiejski. A dalej užo — chto macniej spracuje.
P.S. Kali pišucca hetyja radki, anłajnavaja kanferencyja jašče doŭžycca. Siońnia da 15-j hadziny vy jašče možacie zadać pytańnie voś adsiul.
A voś tut lažyć tekst samoj kanferencyi.
