Uvodziny ŭ modu letniaha sezonu — admysłova dla tych, kamu ŭ takuju śpioku lanota chadzić dalej, čym pa lubimuju hazetu.
Karcinki na dziaŭčatach
Aholeny prykus biednaha Joryka — iluzija śmiarotnaj uśmieški — heta malunak, jaki dyzajnery sioleta namahajucca naciahnuć na hrudzi kožnaj dziaŭčynie. Na tonieńkich tkaninach maječak, pobač z sercajkami i kvietačkami, ščeracca čarapy i skryžoŭvajucca kostki. Schadzicie na apošniuju častku «Pirataŭ Karybskaha mora» — moža być, vy taksama zachopiciesia pirackaj estetykaj na ŭsio hetaje leta.
Vy nia lubicie mora i pirataŭ? Chočacie pryhodaŭ na ziamli? Siaredniaviečnaja hieraldyka i mohiłkavyja hatyčnyja litary — toje, što ŭ spałučeńni ź lohkaj letniaj maječkaj abo bakserskaj majkaj na strojnym dziavočym stanie naradžaje viasiołuju iraničnuju eklektyku.
Sercy bravych rycaraŭ, guns, roses i vostryja šypy na ružavych ściablinach. Čorna‑biełaja ruža, pratknutaja praz serca vašaha Don‑Kichota, ci ruža, jakaja kalučym ściabłom abvivaje jaho mieč? Zakanadaŭcy modaŭ napładzili stolki varyjacyjaŭ symbalaŭ rycarskaj ramantyki, što možna razhubicca.
Aproč prapanavanych varyjantaŭ, možna źviarnuć uvahu na vopratkavy fetyš — roznyja znajomyja i nieznajomyja tvary ŭ vas na majcy ci sukiency. Łamahrafija, šaŭkahrafija, pop‑art — partrety, jakija vy budziecie nasić na sabie, mohuć adlustroŭvać vašy asabistyja prychilnaści abo być nia bolš čym stylovymi detalami.
«Jość u našym u kałhasie pryhažunia słaŭnaja...»
Preč urbanizacyju — letam my jedziem na viosku da babuli, na lecišča da siabroŭki, u les, na łuh, mora, voziera i raku! A heta značyć, što možna dastać z šafaŭ šyrokija bluzki z bavoŭny, topy z karunkami, sialanskija sarafany ŭ drobnuju kvietačku, sukienački ŭ harošak, spadnicy, pad jakimi zahulajecca viecier. Čym bolš znojdziecie vintažnych šortaŭ i kašulaŭ — tym viesialej budzie prachodzić vaš zaharadny adpačynak. Možna navat pravieści spabornictva na kolkaść babulinych rečaŭ, jakija zojmuć hodnaje miesca ŭ vašym modnym harderobie. Tolki abaviazkova pamiatać, što vintaž zakančvajecca tam, dzie zakančvajucca i aktualnyja dla siońniašniaj mody detali. A tam užo pačynajecca sekand‑chend.
Karłsan, jaki žyvie paŭsiul
Letni sezon — jon ža sezon lotny. Zdymajem z karłsanaŭ kambidresy — i palacieli astyvać ad śpioki ŭ abłokach. Sioleta tolki samy lanivy madeljer nie pakazaŭ pamiž astatnich svaich vynachodak jakuju‑niebudź varyjacyju kambinezonu. Praca, viečarynka, hlamurnaja tusoŭka ci navat spatkańnie la raki Śvisłač — ciapier jość kambinezony dla luboj žyćciovaj akazii. Šorciki i biezrukaŭka, lohki šoŭk, jaki chavaje ad sonca ŭsio cieła, abo navat karunkavy kambinezon — heta, vidać, jašče i vielmi zručna. Navat kali kambinezony zasielać usie vašyja šafy, nie zabyvajcie pra try letnija syluety, majučy jakija, našmat praściej vybiracca z domu. Pa‑pieršaje, sukienka‑pepłas — najčaściej z šoŭku ci šyfonu — trymajecca na adnym plačy i pieraviazvajecca na talii. Pa‑druhoje, doŭhi topik z vysokaj talijaj i aholenaj śpinaj. I pa‑treciaje, viadoma ž, spadnica‑ałovak vyšej za kalena. Dyzajnery śćviardžajuć: majučy hetych traich, vy nie prapuścicie leta mima!
Kupalle must go on!
Kali vam padabajecca vaš letašni kupalnik — ničoha i nie pradprymajcie, lišnija hrošy lepš patracić na srodki dla zaharu, tym bolš, što jakasnaja «soniečnaja» kasmetyka kaštuje niamała. Adnak tym, dla kaho vybar novaha kupalnika — sprava pryncypovaja, varta viedać, što hetym letam iznoŭ aktualnyja pałasatyja kupalniki z marskoj i akijaničnaj atrybutykaj. Pałosy ŭ asnoŭnym haryzantalnyja, a voś ich koler i šyrynia — całkam na vaš hust. Pałosy zdajucca niecikavymi — nabyvajcie kupalnik z kvietkavymi matyvami. Bujnyja i jaskravyja ekzatyčnyja kvietki abo drobnaja trapičnaja zielanina dobra vyhladajuć na prosta i ścipła pašytych kupalnikach. Kali vy chočacie być hlamurnymi, vybirajcie kupalniki ahresiŭnyja, załatyja, ź imitavanaj leapardavaj abo źmiainaj skury, śmieła adkrytyja, asymetryčnyja, eratyčnyja... Tolki pamiatajcie, što hlamur — heta vysoki košt. Nabyvać padrobnuju raskošu na Červieńskim rynku vielmi niepažadana.
Pachi i smaki
Niahledziačy na toje, što šalona modnymi robiacca mocnyja i składanyja vodary, uschodnija i šypravyja (naprykład, Euphoria ad Calvin Klein, Hypnose ad Lancome i Lovely ad Sary‑Džesiki Parkier), a na topie parfumavych hit‑paradaŭ pobač z tradycyjnym Chanel № 5 apynuŭsia Armani Code dla žančyn, ciopły i pačućciovy vodar‑dvajnik mužčynskaj versii, letam parfuma pavinna značna ablehčycca. Sałodkija, harkavyja, hłybokija pachi varta pakinuć da vosieni, a pakul prydbać niešta śviežaje, nienaviaźlivaje i kisła‑sałodkaje.
Našy smakavyja i vodarnyja prychilnaści ciesna źviazanyja. Tamu, vybirajučy letniuju parfumu, padumajcie, čym vy lubicie pieramahać haračyniu i łasavacca ŭ ciańku. Moža być, chałodnaj kavaj z muskatnym arecham (Ice Men ad Thierry Mugler), ci ananasami i manhavym marozivam (Sunset Heat ad Escada), abo mandarynkami i ekzatyčnymi jahadkami ličy (Very Irresistible Summer Sun ad Givenchy). Raniej smakavyja noty byli tolki sadavinavymi, ale ciapier možna znajści samyja raznastajnyja matyvy: ad krem‑brule da biełaj šakalady. Maja siabroŭka tak i robić: prychodziačy ŭ parfumavuju kramu, «zamaŭlaje» roznyja smačnaści i zaŭsiody zadavolenaja abranym pacham.
Budźcie ščaślivyja hetym letam, nie zabudźciesia pabiehać basanož, naviedać kancerty i festyvali, pažyć u namiotach, nałavić ryby, nadychacca moram, pahladzieć čužyja krainy i pryhožyja harady. Kab ni pra što nie škadavać uvosień, kali my ŭ čarhovy raz zastyniem u rozdumie pierad rasčynienaj šafaj.
