Na «Naftanie», Mazyrskim NPZ i «Biełarusnafcie» ustaloŭvajucca admysłovyja padatkavyja pasty, što majuć kantralavać pradpryjemstvy ciaham bližejšych troch hadoŭ.
Źjaŭleńnie na viadučych pradpryjemstvach naftachimičnaj pramysłovaści padatkavych pastoŭ adbudziecca pavodle pastanovy Savieta ministraŭ № 750 ad 4 červienia 2007 h. Pavodle ekanamičnaha tydniovika «Biełorusy i rynok», zroblena heta z pryčyny niedavieru ŭradu da infarmacyi pra realny stan u ajčynnaj naftachimii. Pavodle ekspertaŭ, urad prosta nia zdolny pavieryć, što ŭčorašnija lidary ŭ papaŭnieńni biudžetu valutaj, siońnia apynulisia ŭ składanaj ekanamičnaj sytuacyi. Nastupnyja 3 hady supracoŭniki padatkavych orhanaŭ buduć ździajśniać kantrol na terytoryi i ŭ pamiaškańniach hetych pradpryjemstvaŭ. U ich abaviazki ŭvachodzić pravierka vykanańnia padatkavych abaviazalnictvaŭ, adpaviednaść abjomaŭ syraviny kančatkovym abjomam atrymanych praduktaŭ naftapierapracoŭki i h.d.
Na siońnia «Naftan» i Mazyrski NPZ nia majuć ułasnych srodkaŭ ni na zakupku syraviny, ni na abnaŭleńnie mahutnaściaŭ. Pry hetym zavody majuć doŭhaterminovyja prahramy raźvićcia,zhodna jakich «Naftanu» da 2010 h. treba investavać u madernizacyju vytvorčaści $600 młn, a Mazyrskamu NPZ da 2011 h. — $885,5 młn. Z pryčyny źnižeńnia rentabelnaści pradpryjemstvy prypynili mnohija svaje investycyjnyja prajekty.
