Učora ŭ falvarku "Dobryja myśli" prajšła pieršaja z troch zaplanavanych prezentacyj dysku «Načnaja čytanka», vydadzienaha radyjo «Svaboda».
Na prezentacyju sabrałasia kala 40 čałaviek, a taksama ź dziesiatak aŭtaraŭ «Načnoj čytanki». Imprezu pačaŭ bard Viktar Šałkievič, jon vykanaŭ paru piesień i ŭ chutkim časie byŭ vymušany z usimi raźvitacca, bo spaźniaŭsia na ciahnik u Horadniu.
U samym pačatku imprezy viadučy Alaksiej Znatkievič abvieściŭ konkurs, pavodle jakoha žadajučyja mahli napisać svoj śpis aŭtaraŭ, jakija pavinny trapić u nastupnuju «Načnuju čytanku». Biassprečnym pieramožcam staŭ Adam Hlobus, jaho śpis naličvaŭ kala 50 čałaviek. U padarunak piśmieńnik atrymaŭ radyjoprymač.
Svaje vieršy čytali Anatol Ivaščanka, Nasta Kudasava, Leanid Drańko-Majsiuk, Aksana Danilčyk.
Homielski piśmieńnik Siarhiej Bałachonaŭ pračytaŭ uryvak ź jašče niaskončanaha ramanu pra školnaje žyćcio.
Čarhovy raz askandaliŭsia Źmicier Višnioŭ. Jon čytaŭ ese pra svaje pjanki ŭ Słavienii, ale vystup zaciahnuŭsia nastolki, što viadučyja vymušany byli jaho spynić. Abraziŭšysia, Źmicier pačaŭ pasyłać viadučych u adnym dobra viadomym nakirunku. Jašče paśpieŭšy skazać, što bolej jon nia budzie prymać udzieł ni ŭ jakich prajektach «Svabody», Višnioŭ pakinuŭ zalu.
Lavon Volski začytaŭ dźvie kazački, a taksama syhraŭ dźvie pieśni «Miensk – Minsk» i «Prostyja słovy».
Kožny žadajučy atrymaŭ pa dysku. Prezentacyi ŭ «Dobrych myślach» praciahnucca jašče siońnia i zaŭtra.