21 červienia
Akademija kiravańnia nia jdzie
U sudzie Kastryčnickaha rajonu adbyłasia sustreča bakoŭ. Jana była karotkaj. Sudździa Prakapovič zapytała ŭ pradstaŭnika Akademii, ci zhodny toj pajści na miravuju ź Jurasiom Alejnikam, studentam 4 kursu, adličanym za propuski. Atrymaŭšy admoŭny adkaz, sudździa pryznačyła datu čarhovaj sustrečy.
Prakuratura papiaredziła
Ranicaj supracoŭniki milicyi i ludzi ŭ cyvilnym zatrymali kala damoŭ i dastavili ŭ Mienskuju haradzkuju prakuraturu troch moładzievych aktyvistaŭ Jaŭhiena Ivaniuka, Nastaśsiu Šamarej i Nadzieju Mancevič. Usim zatrymanym vynieśli papiaredžańni, jakija padpisaŭ namieśnik prakurora Miensku staršy savietnik justycyi A.Stuk. U papiaredžańniach viadziecca pra toje, što, «pavodle infarmacyi prakuratury Mienskaj vobłaści, maładziony majuć namier arhanizavać i pryniać udzieł u dziejnaści niezarehistravanaj arhanizacyi «Zadzinočańnie biełaruskich studentaŭ», u dačynieńni da jakoj majecca rašeńnie Viarchoŭnaha sudu RB ab likvidacyi abjadnańnia, jakoje ŭžo nabyło moc».
Abaroncy Mahilova
U Mahilovie zachoŭvajecca napružanaja sytuacyja z pryčyny budaŭnictva pravasłaŭnaha chramu na terytoryi Zamčyšča. 21 červienia pradstaŭniki prychodu zatrymali i adviali ŭ pastarunak siabra abjadnańnia «Historyka» Vitala Ruhajna, kali toj sprabavaŭ sfatahrafavać katłavan na Zamkavaj hary. Z pastarunku jaho adpuścili, nie znajšoŭšy nijakich parušeńniaŭ. Na niezakonnyja dziejańni aktyvistaŭ prychodu V. Ruhajn padrychtavaŭ skarhu ŭ milicyju.
Dniom raniej budaŭniki z kamianiami ŭ rukach sustreli inšaha moładzievaha aktyvista, jaki fatahrafavaŭ jaminu.
22 červienia
Michaleviča taksama papiaredzili
Namieśnik staršyni Partyi BNF Aleś Michalevič atrymaŭ papiaredžańnie, padpisanaje namieśnikam prakurora Miensku A.Stukam. Jaho taksama pieraścierahli ad udziełu ŭ niezarehistravanaj arhanizacyi «Zadzinočańnie biełaruskich studentaŭ» dy pastrašyli artykułam 193‑1 KK RB.
Hajdukievič nazvaŭ palitviaźniaŭ kryminalnikami
«U Biełarusi niama palitviaźniaŭ, i my na hetym nastojvajem»,— zajaviŭ u Rymie specyjalny pradstaŭnik ministra zamiežnych spraŭ Biełarusi Siarhiej Hajdukievič. U časie sustrečy ź italjanskim deputatam i dakładčykam Parlamenckaj asamblei Rady Eŭropy pa Biełarusi Andrea Ryhoni, lider Liberalna‑demakratyčnaj partyi padkreśliŭ, što viaźni, pra jakich pišuć na Zachadzie, źjaŭlajucca zvyčajnymi kryminalnikami.
25 červienia
Ju.Alejnika pazbaŭlajuć advakata
Padčas pasiedžańnia pa spravie Ju.Alejnika sudździa Prakapovič vydaliła z pamiaškańnia hramadzkaha abaroncu Aleha Hułaka na toj padstavie, što toj nibyta nia maje paŭnamoctvaŭ pradstaŭlać intaresy studenta ŭ sudzie. Sudovaje pasiadžeńnie adbudziecca 4 lipienia ŭ sudzie Kastryčnickaha rajonu (vuł. Siamaški, 33) u 14.00, kab. 2106.
26 červienia
Arturu Fińkieviču pahražaje turma
Administracyja Mahiloŭskaj speckamendatury ciaham 10 sutak musić vyznačyć dyscyplinarnaje pakarańnie dla Artura Fińkieviča. Palitviaźnia mohuć pakarać da troch hadoŭ pazbaŭleńnia voli. Supracoŭniki kamendatury paličyli parušeńniem režymu toje, što paśla adboju chłopiec zajšoŭ u susiedni pakoj pa validoł.
Sudy admovili śviataram
Sudździa Centralnaha rajonu Taciana Paŭlučuk admoviła u zadavalnieńni pazovu pratestanckaha pastara Jarasłava Łukasika, departavanaha ź Biełarusi. Ja.Łukasik prasiŭ pryznać niezakonnym rašeńnie staršyni Centralnaha RUUS stalicy, zhodna ź jakim jon byŭ aštrafavany za niesankcyjanavanaje nabaženstva i departavany.
Sudździa Mienskaha haradzkoha sudu Alaksiej Rybakoŭ admoviŭ pastaru pratestanckaj carkvy «Jan Pradvieśnik» Antoniju Bokunu ŭ skarzie na rašeńnie sudu Centralnaha rajonu ad 4 červienia. Tady za niesankcyjanavanaje bohasłužeńnie sudździa T.Paŭlučuk asudziła śviatara na 3 sutak aryštu.
Uzialisia za barysaŭskich
U Barysavie vyklikajuć na dopyty apazycyjnych aktyvistaŭ, paplečnikaŭ lidera barysaŭskaj supołki Partyi BNF Siarhieja Sałaša. Pazovy ŭ prakuraturu atrymali Źmicier Babicki, Siarhiej Sacuk, Źmicier Miacielski, Aleh Mackievič. Spravu budzie vieści śledčaja I.Paškievič. U prakuraturu Barysava naviedaŭsia lider ruchu «Za svabodu!» Alaksandar Milinkievič, jaki mieŭ sustreču z prakuroram horadu i rajonu Ŭładzimieram Špakoŭskim. Prakuror zajaviŭ, što nia viedaje pra dopyty, bo znachodziŭsia ŭ adpačynku. Špakoŭski paviedamiŭ, što Sałaša mohuć źvinavacić u abrazie miascovaha načalstva ŭ ŚMI.
