Pakolki ž novy ŭradžaj płanujecca sabrać nie raniej čym praź niekalki miesiacaŭ, mnohim rabotnikam Słonimskaha lnozavoda daviadziecca pracavać u inšych miescach. Kiraŭnictva pradpryjemstva prapanuje ludziam pracaŭładkavańnie ŭ kałhasach i saŭhasach rajona, a tym, chto nie pahadžajecca, kažuć pisać zajavy na adpačynak za svoj košt.
Na siońniašni dzień Słonimski ilnozavod, jak i ŭsie astatnija ŭ krainie, vymušany ŭ abaviazkovym paradku pastaŭlać usiu syravinu fłahmanu biełaruskaj lohkaj pramysłovaści — Aršanskamu ilnokambinatu. Zhodna z pastanovaj urada, ekspart ilnovałakna za miežy krainy zabaronieny.
Adnak Aršanski lnokambinat na praciahu doŭhaha času nie raźličvajecca za nabytuju pradukcyju, što vyklikaje vialikija finansavyja prablemy ŭ słonimskich ilnopierapracoŭščykaŭ.
Čas adnaŭleńnia pracy Słonimskaha lnozavoda pakul što nieviadomy. Usio zaležyć ad budučaha ŭradžaju, jaki ŭ svaju čarhu zaležyć ad nadvorja. U minułym hodzie haspadarki rajona pasiejali lon na płoščy 2 000 hiektaraŭ, ale amal uvieś uradžaj zhniŭ. Sioleta pad hetuju sielskahaspadarčuju kulturu adviedziena 1 200 hiektaraŭ — i što vyraście praź niekalki miesiacaŭ nikomu nie viadoma.
Miž tym Słonimskamu lnozavodu apošnim časam pastupajuć vyhodnyja prapanovy z‑za miažy, ale kiraŭnictva pradpryjemstva nie moža ich realizavać u suviazi z zabaronaj ekspartu.
