У гэтым годзе вакол фестывалю шмат спрэчак і скандалаў наконт праграмы і выбару ўдзельнікаў, але нягледзячы на гэта, каманда вырашыла правесці яго, паведамляюць арганізатары. Яны падрыхтавалі для наведвальнікаў і гледачоў багатую праграму і запрашаюць далучыцца да падзеі. Уваход на ўсе мерапрыемствы вольны.

Тэма 

Тэмай сёлетняга фестывалю PRADMOVA стала паняцце дома — такое важнае, базавае паняцце ў жыцці кожнага чалавека і такое балючае для шматлікіх беларусаў сёння. У межах мерапрыемстваў арганізатары заклікаюць наведвальнікаў «акунуцца глыбей у асэнсаванне дома ў яго шырокім разуменні».

Фестываль пройдзе пад слоганам «Доўгая дарога дадому». 

Удзельнікі 

Як паведамляюць арганізатары, праграма абрала найбольш знаных аўтараў і яскравых дзеячаў культуры Беларусі і замежжа. Свае кнігі на фестывалі прэзентуюць Альгерд Бахарэвіч, Вольга Бубіч, Зміцер Лукашук, Уладзімір Някляеў, Наталля Станкевіч, Аляксандр Хацкевіч, Юля Цімафеева, Аляксандр Чарнуха. 

Возьмуць удзел у імпрэзах таксама і мясцовыя выдаўцы і літаратары. Пра выдавецкую дзейнасць у Грузіі распавядзе выдавец Мамука Хантадзэ, у Кракаве адбудзецца «Ноч паэзіі» з чытаннем вершаў беларускімі і польскімі паэтамі, у Варшаве наведвальнікаў чакае размова пра рэвалюцыі, войны і іншыя ўрокі 20-21 ст. з журналістам і галоўным рэдактарам «Gazeta Wyborcza» Адамам Міхнікам, у Вільні можна будзе паразважаць пра крызіс усходнееўрапейскай ідэнтычнасці з палітолагам, прафесарам філасофіі Гінтаўтасам Мажэйкісам.

Сярод беларускіх удзельнікаў гэтага года — Андрэй Адамовіч, Валянцін Акудовіч, Сяргей Башлыкевіч, Сабіна Брыло, Аляксандр Ждановіч, Севярын Квяткоўскі, Вальжына Морт, Дзмітрый Строцаў, Віка Трэнас, Саша Філіпенка, Андрэй Хадановіч і шмат іншых.

Праграма 

Праграма PRADMOVA уключыла ў сябе мерапрыемствы розных фарматаў: ад дыскусій і прэзентацый кніг да літаратурных прэмій і музычных выступаў. Кожны дзень падчас фестывалю на пляцоўках будуць працаваць кніжныя кірмашы.

Значная частка праграмы прысвечаная мерапрыемствам на галоўную тэму фестывалю — дом. Арганізатары запрашаюць наведвальнікаў на дыскусіі пра эміграцыю і крызісы ўсходнееўрапейскай ідэнтычнасці.

На PRADMOVA запланаваныя імпрэзы не толькі для дарослых, але і для дзяцей і падлеткаў. У Тбілісі на працягу ўсяго фестывалю будзе працаваць пляцоўка ад «Буслік-хаба». Дзіцячыя мерапрыемствы адбудуцца таксама і на пляцоўках у Кракаве і Варшаве.

Пляцоўкі

Фестываль пройдзе з 4 па 26 чэрвеня на пляцоўках у Тбілісі, Кракаве, Варшаве і Вільні.

У кожным горадзе, акрамя Кракава, фестываль будзе доўжыцца два дні: 4-5 чэрвеня Тбілісі (Інстытут Гётэ, Mikheil Zandukeli St. 16), 12 чэрвеня Кракаў (Віла Дэцыюса, ul. 28 Lipca 1943 roku 17A ), 18-19 чэрвеня Варшава (Беларускі моладзевы хаб, plac Konstytucji 6), 25-26 чэрвеня Вільня (Imaguru, Vytenio g. 18). 

Таксама з 4 па 26 чэрвеня адбудзецца анлайн-PRADMOVA — серыя анлайн-сустрэч і прэзентацый у межах фестывалю.

Уваход на ўсе мерапрыемствы праграмы фестывалю вольны, на анлайн-імпрэзы патрабуецца рэгістрацыя.

Падрабязная праграма фестывалю са спасылкамі на рэгістрацыю на анлайн-праграму па спасылцы.

Сачыць за фестывалем магчыма на старонках Facebook PRADMOVA і Instagram PRADMOVA.

Чытайце таксама:

«Чаму беларусы павінны цясніцца?» Фестываль PRADMOVA паклікаў выступіць расійскага кінакрытыка — і сутыкнуўся з крытыкай

Жбанкоў аб Доліне і «Прадмове»: Мяне злуе, што расейскія стравы падаюць з асаблівым «восторгом»

Андрэй Дынько: Пара думак з нагоды маленькай пераможнай вайны з Доліным і Шандаровічам

Антон Долін адмовіўся ад удзелу ў фестывалі «Прадмова»

Клас
Панылы сорам
Ха-ха
Ого
Сумна
Абуральна

Хочешь поделиться важной информацией анонимно и конфиденциально?

Чтобы оставить комментарий, пожалуйста, активируйте JavaScript в настройках своего браузера