28 верасня на Атлантык-авеню ў Брукліне (Нью-Ёрк, ЗША) адбыўся 40-ы фестываль «Атлантык-Антык», у якім традыцыйна прынялі удзел парафія Кафедральнага Сабора Кірыла Тураўскага і бруклінскі аддзел БАЗА.
Як і штогод, прыхаджане сабору гандлявалі беларускімі стравамі.
Арганізатары мерапрыемства ўзнагародзілі парафію сабора як найстарэйшага удзельніка фестывалю шкляной памятнай граматай.
У рамках фестывалю ў грамадскай зале сабора адбыўся прагляд серыі дакументальных фільмаў Babylon-13 украінскага рэжысёра Юрыя Грузінава, знятых ім з кастрычніка 2013 года.
Пасля прагляду адбылася дыскусія з удзелам актывісткі украінскага руху ў Нью-Ёрку Наталлі Стэльмах, старшыні Бруклінскага аддзела БАЗА Андрэя Асадчага і актывіста грузінскай дыяспары Леа Тактакішвілі. Мадэратарам дыскусіі быў Зміцер Шчыгельскі. Удзельнікі абмеркавалі паралелі паміж падзеямі ў Грузіі ў 2008 годзе і ва Украіне ў 2013-2014 і магчымыя ўрокі з іх для Беларусі.
Адзначаныя цікавасць грамадзян Украіны і Грузіі да стварэння Балта-Чарнаморскага саюза і важнасць люстрацый асоб, што займалі высокія палітычныя пасады ў савецкія часы.