Дэкрэт адмяняе таксама неабходнасць атрымання згоды прэзідэнта Беларусі або абласных (Мінскага гарадскога) Саветаў дэпутатаў на рэарганізацыю юрыдычных асоб, створаных да 24 сакавіка 1998 года ў працэсе раздзяржаўлення і прыватызацыі прадпрыемстваў.
Як адзначылі ў Дзяржкаммаёмасці, дэкрэт выдадзены ў мэтах удасканалення заканадаўства па пытаннях прыватызацыі дзяржаўнай маёмасці, абароны правоў і законных інтарэсаў грамадзян.
Дакумент таксама прадугледжвае фарміраванне на трохгадовы перыяд плана прыватызацыі аб’ектаў рэспубліканскай уласнасці. Будзе складацца пералік рэспубліканскіх унітарных прадпрыемстваў, якія падлягаюць прыватызацыі шляхам пераўтварэння ў адкрытыя акцыянерныя таварыствы. Таксама прадугледжана фарміраванне на трохгадовы перыяд пералікаў акцыянерных таварыстваў, акцыі якіх, што належаць Рэспубліцы Беларусь, падлягаюць продажу.
Мясцовым Саветам дэпутатаў даручана ў трохмесячны тэрмін распрацаваць і зацвердзіць аналагічны парадак фарміравання планаў прыватызацыі аб’ектаў, якія знаходзяцца ў камунальнай уласнасці, а таксама продажу акцый ААТ, якія знаходзяцца ў камунальнай уласнасці.
Дэкрэт здымае забарону на адчужэнне акцый адкрытых акцыянерных таварыстваў, за выключэннем ААТ, якія забяспечваюць функцыянаванне стратэгічна значных галін эканомікі і (або) іншыя важныя дзяржаўныя патрэбнасці. Пералік такіх прадпрыемстваў таксама будзе складацца і зацвярджацца Саветам Міністраў па ўзгадненню з прэзідэнтам краіны.
Такім чынам, адзначылі ў Дзяржкаммаёмасці, з 1 чэрвеня 2008 года здымаецца мараторый на продаж акцый ААТ, у якіх доля дзяржавы ў статутным фондзе на 31 сакавіка 2008 года адсутнічае або складае 75 працэнтаў і больш. А з 1 студзеня 2009 года гэта будзе датычыцца і акцыянерных таварыстваў, дзе доля дзяржавы складае больш як 50 працэнтаў.
Акрамя таго, дэкрэтам выключаны такі спосаб прыватызацыі, як выкуп арандаванай дзяржаўнай маёмасці, таму што цяпер ён страціў актуальнасць.