«Адносіны з Беларуссю могуць яшчэ раз скандальна праславіць Літву ў ЕС. Гэтым разам беларускі рэжым абыграў Літву ў яе ўласным судзе», піша Lietuvos rytas.
Віленскі акруговы адміністрацыйны суд ўчора задаволіў скаргу паплечніка Аляксандра Лукашэнкі Уладзіміра Пефціева і трох кіраваных ім кампаній у дачыненні да Міністэрства замежных спраў Літвы і Службы расследаванняў фінансавых злачынстваў.
У.Пефціеў, якога лічаць адным з самых багатых людзей Беларусі, прасіў скасаваць рашэнне МЗС Літвы, якое дазваляе замарозіць яго асабістыя рахункі ў еўрапейскіх банках.Гэта -- частка эканамічных санкцый, рашэнне аб ўжыванні якіх Савет ЕС прыняў яшчэ ў мінулым годзе, рэагуючы на рэпрэсіі беларускіх уладаў у дачыненні да апазіцыі.
Аднак літоўскаму суду яны здаліся неабгрунтаванымі. Прадстаўнікі міністэрства сказалі Lietuvos rytas, што абмяркуюць, ці варта абскардзіць рашэнне суда.
- 20 чэрвеня 2011 года Савет ЕС прыняў рашэнне пашырыць спіс беларускіх грамадзян і кампаній, на якія распаўсюджваюцца санкцыі ў сувязі з парушэннем правоў чалавека ў Беларусі, уключыўшы ў яго ў тым ліку Уладзіміра Пефціева і тры кампаніі — ЗАТ «Белтэхэкспарт», ЗАТ «Спорт-пары» і ПУП «БТ Тэлекамунікацыі». У дакументах ЕС Пефціеў значыцца як «асоба, звязаная з прэзідэнтам Лукашэнкам і яго сям’ёй, галоўны эканамічны саветнік прэзідэнта Лукашэнкі і ключавы фінансавы спонсар рэжыму Лукашэнкі, старшыня савета акцыянераў „Белтэхэкспарта“, буйнейшай у Беларусі кампаніі імпарту-экспарту ўзбраенняў».
- Санкцыі ў дачыненні да названых кампаній былі ўведзеныя на падставе таго, што ўсе яны «падкантрольныя Уладзіміру Пефціеву». Пефціеву забаронена наведваць тэрыторыю ЕС, а яго рахункі і маёмасць у краінах ЕС павінны быць замарожаны. Яго кампаніям забаронена весці бізнес на тэрыторыі краін ЕС. Гэта рашэнне Пефціеў аспрэчвае ў судзе Еўрасаюза, куды 12 жніўня накіраваў іск.
0
0
0
0
0
0
