Польшча дамаглася вызвалення больш за 10 палітвязняў у Беларусі — прадстаўнік МЗС
Польшчы ўдалося дамагчыся вызвалення больш за 10 палітвязняў у Беларусі. Пра гэта ў эфіры Польскага радыё распавёў намеснік міністра замежных спраў Польшчы Павел Яблоньскі.
29.03.2023 / 13:17
Марыя Цішкоўская, Ірэна Бярнацкая і Ганна Панішава. Фота: Белсат
Па словах Яблоньскага, дыпламатычныя метады ў адносінах з Беларуссю ненадзейныя, але Польшча ўсё ж дамагаецца некаторых поспехаў.
«Нам удалося дасягнуць мэты ў выпадку нават больш за 10 чалавек. Я не хачу казаць пра дэталі гэтых спраў, таму што кожны раз быў індывідуальны падыход. У выпадку такіх перамоваў трэба быць асцярожным. Самы вялікі поспех —дамагчыся вызвалення палітвязняў. Я цяпер кажу пра палякаў, якія знаходзяцца ў беларускіх турмах, таму што гэта для нас прыярытэт, але нам трэба памятаць, што па палітычных матывах асуджаныя ў Беларусі больш за 1500 чалавек», — заявіў Яблоньскі.
У 2021 годзе Беларусь вызваліла трох актывістак польскай меншасці. Яны былі высланыя з Беларусі ў Польшчу: Ганну Панішаву, Марыю Цішкоўскую і Ірэну Бярнацкую. У сакавіку 2022 года кіраўніка незарэгістраванага Саюза палякаў Беларусі Анжаліку Борыс вызвалілі з-пад варты і перавялі пад хатні арышт. 9 лютага на 8 гадоў калоніі асудзілі журналіста Андрэя Пачобута.
Чытайце таксама:
Мінск запрасіў сустрэчу з затрыманымі ў Польшчы беларусамі