Jeŭrabačańnie: pieramahła Danija, Biełaruś na 16-m miescy - anłajn finału Za kaho hałasavali vy? 16

Takim čy Najvyjšejšuju adznaku - 12 bałaŭ - Biełaruś atrymlivaje ad Ukrainy. Ad Biełarusi 8 bałaŭ atrymała Rasija, 10 - Azierbajdžan, 12 - Ukraina.

Siońnia ŭ Malmio adbudziecca finał Jeŭrabačańnia. «Naša Niva» zaprašaje vas razam z nami pahladzieć-pasłuchać-abmierkavać vystupoŭcaŭ i ich pieśni. Siońnia ŭ našaj prahramie: ciažarnaja estonskaja śpiavačka, italjanski kruner, vialikaja Boni Tajler, tranśviestyty, jakija natoŭpam pryjechali padtrymać Finlandyju i, kaniečnie, Alena Łanskaja i jaje płanieta Soleyoh!

Francyja

Amandzin Buržua L'enfer et moi

I pačynajecca finał z francuzskaj estradnaj pieśni «Piekła i ja» ŭ vykanańni Amandzin Buržua. Francyja prachodzić u finał biez konkursu — adna z šaści krain, jakija majuć takoje prava. Pieśnia vielmi simpatyčnaja, urešcie, u francuzaŭ da estradnaj muzyki zaŭždy byŭ svoj padychod. «Piekła» možna było b słuchać i biez usialakich konkursaŭ.

Litva

Andrus Pajavis Something

O jak radavalisia hetamu śpievaku łatvijskija kamientatary Jeŭrabačańnia — maŭlaŭ, na fonie Litvy łatyšski hurt budzie hladziecca hodna. Darečy, mieli racyju. Adzinaje, čym možna patłumačyć najaŭnaść Pajavisa ŭ finale — toje, što jon pryjšoŭ z «savieckaha» paŭfinału, dzie ŭdzielničała adrazu šeść krain byłoha SSSR. Musi, tavaryšy pa niaščaści dapamahli.

Małdova

Alona Mun — O mie

Paŭtarusia, kali b hetaja pieśnia była pierakładziena na anhlijskuju, to ŭ finale b my jaje nie pačuli. I ničoha b nie zhubili. A tak atrymałasia miła, a heta ŭžo nie skazać, kab mała.

Finlandyja

Krysta Zihfryds — Marry me

U paŭfinale jana radavała nas leśbijskim pierformansam, za jaki jaje musili dyskvalifikavać: jana śpiavała pieśniu pra viasielle i ŭ kancy pacałavała bek-vakalistku. Moža ŭ finale Krysta pierformans dapracavała? Bo pieśniu dapracoŭvać nie treba — amal Keci Pery. Adnak, na scenie toje samaje, što i ŭ čaćvier.

Ispanija

El Sueño de Morfeo — «Contigo hasta el final

Časam zdajecca, što krainy, jakija adrazu traplajuć u finał, i nie imknucca pieramahčy. Voś i Ispanija sioleta — pieśnia pryhožaja, niaŭžo hetaha niedastatkova? Nasamreč, pieśnia krychu mienš radyjnaja, čym treba dla pieramohi. Ale heta ž Jeŭrabačańnie, a nie Alimpijada.

Bielhija

Rabierta Biełaroza — Love Kills

Rabierta Biełaroza zmoža ŭpisać u svajo tvorčaje CV: «trapiŭ u finał Jeŭrabačańnia». A voś jak jon vystupiŭ, kolki atrmaŭ bałaŭ ad jakoj krainy, i, u rešcie rešt, jakaja ŭ jaho była pieśnia, naŭrad ci chto ŭzhadaje praz hod.

Estonija

Birhit Yjhiemieel — Et uus saaks alguse

A voś i aktrysa Birhit, jakaja časam udzielničaje ŭ pastanoŭkach pjes Šekśpira. Ciapier jana, darečy, na šostym miesiacy ciažarnaści. Taja samaja situacyja, što i z Małdovaj — dobra, što na rodnaj movie. Bo pa-anhlijsku hetaja pieśnia b zhubiłasia jašče na prastorach paŭfinału. A tak «cukru» b ź jaje dastać, zusim było b dobra.

Biełaruś

Alona Łanskaja — Solayh

Nu, momant iściny. Alona Łanskaja praśpiavała viesieła i radasna. Z takim numaram možna było b jašče raz pieramahčy na «Słavianskim bazary». Nas tut, darečy, supakoili, što jaje sukienka važyć usiaho piać kiłahramaŭ, a nie jak my bajalisia. U lubym razie, Biełaruś jość z čym pavinšavać — a) my ŭ finale, b) Łanskaja zojmie miesca vyšejšaje, čym «3+2» (darečy, cikava, dzie jany padzielisia?) u 2010 hodzie. Tym bolš, što Łanskaja vyhladaje vielmi ŭpeŭniena.

Malta

Džanłuka Biezina — Tomorrow

Malta vyjšła ŭ finał i heta dobra: my majem mahčymaść pasłuchać tuju muzyku, jakuju b tranślavała nasamreč dobraje radyjo. Na scenie Biezina i siabry stvarajuć vielmi pryjemnaje ŭražańnie: prosta i z hustam.

Rasija

Dzina Harypava — What If

Abajalnaja tatarka Dzina Harypava ź internacyjanalisckim himnam pra «Što, kali". u bukmiekieraŭ apuściłasia na prystupku nižej — zamiest čaćviortaha miesca jana ciapier maje piataje — abahnaŭ jaje pradstaŭnik Azierbajdžana. Kali b jaje talent, dy na jakuju inšuju pieśniu, nie pra mir va ŭsim śviecie.

Hiermanija

Cascada — Glorious

«Siońnia nočču my možam być słaŭnymi» — śpiavaje ŭ tradycyjach sučasnaj jeŭrapiejskaj estrady niamiecki hurt Cascada. Niemcy praanalizavali minułahodni pośpiech Łaryn, i zrabili niešta padobnaje. Atrymałasia nie tak stylova.

Armienija

Dorians — Lonely Planet

Nu nie ŭpisvajecca ŭ farmat Jeŭrabačańnia hetaja pieśnia, što tut zrobiš. Toni Ajomi vysakakłasny muzyka, adnak śpiecyjalistam u stvareńni pieśniaŭ dla Jeŭrabačańnia nikoli nie byŭ. I dziakuj Bohu, bo ŭjavicie, jak by tady hučaŭ Black Sabbath.

Niderłandy

Anuk — Birds

My pisali, što Anuk pryjechała z najlepšaj pavolnaj pieśniaj konkursu, adnak prablema ŭ tym, što takaja pieśnia fizična nie moža stać chitom ź Jeŭrabačańnia. Tym nie mienš pryjemna, što sprava Maryjan Fejtfuł praciahvaje žyć.

Rumynija

Čezar — It's my Life

Jość mierkavańnie, što rumyn Čezar uratavaŭ žyćcio ŭsiamu prafiesijnamu žury — inakš jak rastłumačyć jaho najaŭnaść u finale? Samaje kryŭdnaje, što ŭ bukmiekieraŭ jon idzie na pazicyju vyšej za Łanskuju, chacia naša Alona ŭ paraŭnańni ź im minimum Linda Ronstadt.

Vialikabrytanija

Boni Tajler — Believe in me

Boni Tajler stała zorkaj jašče ŭ tyja časy, kali niekatoryja ŭdzielniki Jeŭrabačańnia nie naradzilisia. U minułym hodzie Brytanija adpraviła na konkurs jašče adnaho vieterana Enhielbierta Champierdzinka. I jaje pieśnia, i jaho pieśnia — u lepšych tradycyjach anhlijskaj pop-muzyki, jakaja dyktuje modu ŭsiamu śvietu voś užo paŭstahodździa. Niezrazumieła, ci heta novy brytanski sposab reanimavać starych zorak? Kali tak, to lepiej źviarnucca da pradziusara Ryka Rubina, jon heta ŭmieje lepiej, čym luboje Jeŭrabačańnie.

Isłandyja

Ejtoŭr Inhi Hiunlohsan — Eg a Lif

Voś cikava, ci ŭsprymałasia b hetaja pieśnia lepiej, kali b Ejtoŭr, jaki vyhladaje jak piersanaž lehiendaŭ i mifaŭ staražytnaj Isłandyi, pajšoŭ za paradaj «Našaj Nivy» i pryniaŭ tłustuju arkiestroŭku? Bolej ža i skazać niama čaho.

Azierbajdžan

Faryd Mamiedaŭ — Hold Me

Faryda bukmiekiery palubili adrazu i nazaŭsiody — raptoŭna jon vyjšaŭ na čaćviortaje miesca, jakoje da taho zajmała Harypava. Što tyčycca pieśni i šou, to, pa-pieršaje, akcentu ŭsio jašče šmat. Pa-druhoje, ideja z pryzmaj z čałaviekam unutry padajecca ŭdałaj. Nie horšaj za dyska-šar, heta ŭžo dakładna.

Hrecyja

Koza Mostra i Ahafonis Iakavidzis — Alcohol is Free

Chop-chop, bałkanski ska! Kali ŭ Hrecyi nasamreč tak lubiać adpačyvać i viesialicca, to zrazumieła, čamu ŭ ich adbyŭsia kryzis. Hałoŭnaje, kab delehacyja Hrecyi ŭ vypadku projhryšu nie pajšła bić vitryny. Tym bolš z takoj vo nazvaj kalektyva. Pryjemna było pačuć chłopcaŭ jašče raz.

Ukraina

Złata Ahnievič — Gravity

U čym patencyjnaja chitovaść pieśni Złaty Ahnievič, aŭtar nie skazać kab razumieŭ. Tym nie mienš, kali nie de Forest, to jana. Bukmiekiery padmanvać nie buduć.

Narviehija

Marharet Bierhier — I Feed You my Love

«Indastryjał» jak jaho ŭjaŭlaje metavaja aŭdytoryja fm-efiru. Tym nie mienš, treciaja favarytka Jeŭrabačańnia, pra jakuju my ŭžo pisali dvojčy. Novaha tam ničoha nie źjaviłasia, ale tam i tak usio było niakiepska.

Hruzija

Safo Hiełavani i Nadzika Tacišvili — Waterfall

Adna ź pieśniaŭ druhoha paŭfinału, pra jakuju ciažka ŭzhadać, što jana tam była. A jana była, i dosyć paśpiachova — usio ž taki trapiła ŭ finał. I čym Biełaruś, naprykład, horšaja? I čym usie papiarednija (aproč Rumynii) vystupoŭcy horšyja?

Irłandyja

Rajan Dołan — Only Love Survives

Lepiej za ŭsio biełaruskamu hledaču Dołan zapomniŭsia tym, što biełaruskija kamientatary nazvali jaho «niaškam». Chaj by Dołan nie pa Jeŭrabačańniach jeździŭ, a dalej študziravaŭ anhlijskija pop-zakony — ź jaho jašče moža atrymacca značny pop-śpiavak.

Juraś Uskoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH