U 2013 hodzie admoŭnaje salda źniešniaha handlu tavarami i pasłuhami ŭ Biełarusi skłała 1 młrd 723,8 młn dołaraŭ. Takija danyja apublikavaŭ Nacyjanalny statystyčny kamitet. Adnosiny salda źniešniaha handlu tavarami i pasłuhami da VUP skłali minus 2,4%.
Miž tym u 2012 hodzie salda było stanoŭčym i skłała pa vynikach hoda 3 młrd 23,4 młn dołaraŭ — dziakujučy handlu rastvaralnikami. Zadaču zachavać źniešniehandlovaje salda stanoŭčym urad staviŭ i na 2013 hod.
Za minuły hod abjom źniešniaha handlu tavarami i pasłuhami pa mietadałohii płaciežnaha bałansu skłaŭ 89,5 młrd dołaraŭ ZŠA, u tym liku ekspart — 43,9 młrd dołaraŭ, impart — 45,6 młrd. Da ŭzroŭniu 2012 hoda z raźliku ŭ ciapierašnich cenach abjom źniešniaha handlu tavarami i pasłuhami skłaŭ 88,8%, ekspart — 84,5% (prahnoz na 2013 hod — 115,2%), impart — 93,3%.
Jak adznačyli ŭ Biełstacie, vyznačalny ŭpłyŭ na farmiravańnie ahulnaha vartasnaha abjomu ekspartu tavaraŭ i pasłuh akazvajuć zamiežnahandlovyja apieracyi z tavarami, dola jakich u 2013 hodzie skłała 83,4%. Układ pasłuh zastajecca nievysokim (16,6%). Razam z tym «nazirałasia stanoŭčaja dynamika jaho rostu — u paraŭnańni z 2012 hodam dola pasłuh pavialičyłasia na 4,4 pracentnaha punkta».
Admoŭnaje salda zamiežnaha handlu tavarami ŭ 2013 hodzie skłała 4 młrd 561,9 młn dołaraŭ. Abjom źniešniaha handlu tavarami ŭ 2013 hodzie skłaŭ 80,2 młrd dołaraŭ, u tym liku ekspart 37,2 młrd, impart — 43 młrd. Vartasny abjom ekspartu respubliki ŭ paraŭnańni z 2012 hodam z raźliku ŭ biahučych cenach pamienšyŭsia na 19,2%, ci na 8,8 młrd dołaraŭ, impartu — na 7,3%, ci 3,4 młrd dołaraŭ.
Pakupnickaja zdolnaść biełaruskaha ekspartu ŭ 2013 hodzie ŭ paraŭnańni z 2012-m pamienšała na 19,1%. Heta abumoŭlena «padzieńniem fizičnych abjomaŭ pastavak tavaraŭ na źniešnija rynki i niespryjalnymi cenavymi ŭmovami». U paraŭnańni z 2012 hodam tavarnaja masa ekspartu pamienšyłasia na 17,4%, impartu — na 7,2%. Siarednija ceny ekspartu źnizilisia na 2,1%, impartu — na 0,1%.
Najbolš istotna skaracilisia fizičnyja abjomy ekspartu inviestycyjnych (na 14,5%) i pramiežkavych (na 22,6%) tavaraŭ, u tym liku enierhietyčnych (na 21,5%) i inšych pramiežkavych tavaraŭ (na 25,6%). Źnižeńnie siarednich cen ekspartu nazirałasia ŭ hrupie pramiežkavych tavaraŭ (na 5,2%), što vyklikana padzieńniem cen na enierhanośbity (na 7%). Značna skaracilisia fizičnyja abjomy ŭvozu enierhanośbitaŭ (na 29,6%), siarednija ceny źnizilisia ŭ hrupach enierhietyčnych i inšych tavaraŭ (na 0,4% i na 1,9% adpaviedna).
