U Rasii honiać chvalu abureńnia zajavaj ukrainskaha premjer-ministra Arsienia Jacaniuka, jakuju jon zrabiŭ padčas intervju niamieckamu telekanału ARD u časie svajho vizitu ŭ Niamieččynu.
«Rasijskaja ahresija na Ukrainie — heta ataka na suśvietny paradak i paradak u Jeŭropie. My ŭsie dobra pamiatajem ŭvarvańnie SSSR u Niamieččynu i na Ukrainu. My nie pavinny dapuścić hetaha. Ni ŭ kaho niama prava pierapisvać vyniki Druhoj suśvietnaj vajny. Adnak mienavita heta sprabuje zrabić rasijski prezident Pucin», — skazaŭ Jacaniuk.
Jacaniuk mieŭ na ŭvazie zachop balšavikami Ukrainskaj Narodnaj Respubliki ŭ 1920 hodzie i padzieł Hiermanii Bierlinskaj ścianoj.
Adnak rasijskija ŚMI prypisvajuć Jacaniuku zusim supraćlehłaje.
RIA «Novosti» piša, Jacaniuk ličyć, što Rasija «sprabuje pierapisać» vyniki Druhoj suśvietnaj vajny.
Pucinski LifeNews pajšoŭ jašče dalej i prypisaŭ Jacaniuku datu ŭvarvańnia.
«Arsienij Jacaniuk zrabiŭ fundamientalnaje adkryćcio ŭ halinie historyi. Akazvajecca, 22 červienia 1941 h. Saviecki Sajuz napaŭ na Hiermaniju», — zajaviła viadučaja, uhledzieŭšy ŭ hetym suviaź z paŭmiljardnym kredytam Niamieččyny dla Ukrainy.
Deputat Dziarždumy Alaksiej Puškoŭ vykazaŭ zdahadku, što «Jacaniuka kančatkova paniesła».
«Paśla jaho zajavy ab «uvarvańni SSSR u Hiermaniju i va Ukrainu» ŭ Druhuju suśvietnuju jaho nielha ŭsprymać surjozna», — napisaŭ hety rasijski palityk u Twitter.
Abvinavačvańnie Ukrainy va ŭsich śmiarotnych hrachach było častkaj abhruntavańnia zachopu Kryma i sproby zachopu Danbasa ŭ 2014-m.