Lilija Ananič, fota Kiryły Chilko
Dziaržava zrobić usio, kab Biełaruś nie stała arenaj infarmacyjnaj vajny, zajaviła ministr infarmacyi Lilija Ananič, vystupajučy na X Mižnarodnym miedyjaforumie, jaki prachodzić u Minsku.
Pavodle jaje słoŭ, kanflikty, jakija razhortvajucca ŭ śviecie, «nahladna pierakonvajuć», što «spakusa vykarystoŭvać mas-miedyja jak prapahandyscki resurs u infarmacyjnym supraćstajańni nie zastałasia ŭ minułym».
«Infarmacyjnyja pravakacyi stali paŭsiadzionnaj rucinaj, jakaja farmiruje ŭ ludziej skažonuju karcinu śvietu. Šmat prykładaŭ, kali ŭ destruktyŭnych metach vykarystoŭvajucca nacyjanalnyja, kanfiesijnyja, palityčnyja, sacyjalna-ekanamičnyja prablemy, jakija majuć najbolšy kanfliktny patencyjał», — zajaviła Ananič.
Adnak vyrašeńnie ŭsich prablem, pavodle jaje mierkavańnia, moža być znojdziena «tolki ŭ kanstruktyŭnym klučy», u toj čas jak «padtasoŭvańnie faktaŭ, nahniatańnie straściej, pošuk vorahaŭ zaŭsiody viaduć da hramadskich supraćstajańniaŭ i kanfliktaŭ».
Pavodle słoŭ Ananič, časam ŚMI «padkidvajuć faktyčna nie isnyja, marhinalnyja prablemy», jakija «nahniatajuć napružanaść u hramadstvie». Meta hetaha vidavočnaja — jana zaklučajecca ŭ tym, kab «ubić klin pamiž krainami i narodami», miarkuje kiraŭnik Mininfarma.
«Biełaruś nie prymaje takuju palityku i takija pamknieńni, — padkreśliła Ananič. — Naša infarmacyjnaja prastora, nacyjanalnyja ŚMI ŭ absalutnaj svajoj bolšaści demanstrujuć imknieńnie da ŭzvažanaha, kanstruktyŭnaha aśviatleńnia samych składanych prablem sučasnaści».
«My zrobim usio, kab infarmacyjnaja prastora Biełarusi nie stała arenaj infarmacyjnaj vajny», — zapeŭniła ministr.
Pavodle jaje słoŭ, siońnia Biełaruś vymušanaja «pa-novamu zirnuć na isnuju sistemu abarony svajoj infarmacyjnaj prastory», jakaja pavinna stać «hnutkaj i adkazvać usim patrabavańniam času». I ŭ pieršuju čarhu nieabchodna «zaścierahčy hramadzian ad vykarystańnia ŭ dačynieńni da ich manipulacyjnych technałohij», nie parušyŭšy pry hetym ich kanstytucyjnaha prava na atrymańnie infarmacyi, padkreśliła Ananič.
