Sacyjalnaja sietka Facebook dadała novyja opcyi kantrolu stužki navin karystalnika, pišuć u błohu kampanii. Jany ŭžo dastupnyja ŭ veb-viersii Facebook, stanuć dastupnyja paśla abnaŭleńnia mabilnaha klijenta dla iOS 9 červienia, dla Android u bližejšyja tydni.
Ciapier Facebook dazvolić lohka abrać karystalnikaŭ i staronki, čyje pasty nie chočacca prapuskać. Ich pasty buduć vyvodzicca na pačatku stužki. Funkcyja maje nazvu «See first».
Razam z tym novyja nałady dazvolać lahčej adpisvacca ad niecikavych ludziej i adnaŭlać skasavanyja padpiski.
Facebook viadomy tym, što, u adroźnieńnie ad bolšaści sacsietak, vydaje pasty ŭ stužcy navin pa zmoŭčańni nie ŭ chranałahičnym, a ŭ «zahadkavym» paradku. Sacsietka nie raskryvaje miechanizm sartyroŭki, pavodle jakoha pakazvajucca daloka nie ŭsie, a tolki «samyja cikavyja» (pavodle analizu pavodzin karystalnika) pasty.
Siarod pradstaŭlenych funkcyj niašmat novych — niešta padobnaje ŭžo było na Facebook i raniej.
Čytajcie padrabiaźniej: Jak zrabić vašu piersanalnuju stužku navin Facebook cikavaj i karysnaj
Kab nie prapuskać pasty siabroŭ, ich jak raniej, tak i ciapier možna dadać u śpis «Blizkich siabroŭ» («Close Friends») — tady pra kožny novy post budzie prychodzić asobnaje paviedamleńnie (ale takija pasty buduć pakazvacca ŭ stužcy tak ža, jak i lubyja inšyja). Funkcyi paviedamleńniaŭ pra pasty staronak raniej nie było.
Taksama nie było śpisu tych, ad čyich pastoŭ karystalnik adpisaŭsia, chacia kožny fakt paasobku fiksavaŭsia va ŭkładcy «Prahladzieć aktyŭnaść» («Activity Log»). Adpisacca ad niecikavych ludziej i staronak i raniej, i ciapier možna, nacisnuŭšy na strełačku sprava ad pasta i abraŭšy «Schavać dopis» («Hide post») dy dalejšyja varyjanty.
Jak raniej, tak i ciapier možna abrać nie tolki «zahadkavy» paradak pastoŭ u stužcy, ale i chranałahičny. Dla hetaha treba nacisnuć na strełačku pobač z nadpisam «Stužka navinaŭ» («News Feed») u levaj kałoncy i abraŭšy «Apošnija» («Most Recent»). Praŭda, pracuje heta tolki ŭ veb-viersii — u mabilnych klijentach dastupny tolki «zahadkavy» paradak pastoŭ.
