U 2012 hodzie małady biełaruski fatohraf bolš za miesiac pravioŭ u SIZA KDB Biełarusi pa abvinavačańni ŭ tym, što nibyta dapamahaŭ arhanizataram «plušavaha desantu» nielehalna trapić u krainu.
Paśla hučnaj kampanii salidarnaści žurnalistaŭ Antona Surapina vyzvalili pad padpisku, a potym i naohuł źniali ź jaho abvinavačańni. Tady chłopiec vyrašyŭ damahacca kampiensacyi za miesiac źniavoleńnia.
– Pavodle zakanadaŭstva ja maju prava na kampiensacyju maralnaj škody ad dziejańniaŭ śledčych. Ja vyrašyŭ damahacca hetaha, jak tolki ź mianie źniali abvinavačańni. Ale śledčyja, vidavočna, nie chacieli, kab heta adbyłosia. Jany ŭparta nie pradastaŭlali mnie nieabchodnych dakumientaŭ. Tamu letaś, jak tolki ja viarnuŭsia z vojska, my razam ź jurystami HA «Biełaruskaja asacyjacyja žurnalistaŭ» padrychtavali pozvu ŭ sud. Ja zapatrabavaŭ kampiensacyju ŭ pamiery 190 miljonaŭ rubloŭ, ale pradstaŭniki dziaržavy chadajničali ŭ sudzie pra spynieńnie pracesu, – raskazaŭ Anton Surapin pres-słužbie HA «Biełaruskaja asacyjacyja žurnalistaŭ».
Niahledziačy na heta, 2 sakavika 2016 hoda sud Maskoŭskaha rajona pastanaviŭ vypłacić Antonu Surapinu kampiensacyju ŭ pamiery 8 miljonaŭ biełaruskich rubloŭ.
– I my, i Ministerstva finansaŭ – adkazčyk pa spravie – adrazu ž padali skarhi na hetaje rašeńnie ŭ Minski haradski sud. I voś narešcie stała viadoma, što kasacyjny sud pakinuŭ rašeńnie ŭ sile, i ciapier Ministerstva finansaŭ maje vypłacić mnie hetyja hrošy. U cełym ja zadavoleny – heta pieršy precedent za apošnija hady, kali čałaviek, pryznany mižnarodnaju supolnaściu palitviaźniem, damohsia kampiensacyi.
Ciapier u mianie dva šlachi. Pieršy – padavać skarhu u Viarchoŭny sud, kab pavialičyć pamier kampiensacyi, bo 8 miljonaŭ za miesiac aryštu i amal hod pad padpiskaj pra niavyjezd – heta niesuvymierna. Druhi – padać skarhu ŭ Hienieralnuju prakuraturu, kab prymusić KDB aficyjna vybačycca pierada mnoj za tuju historyju. A jašče ja vielmi ŭdziačny BAŽu i asabista Alehu Ahiejevu za prafiesijnuju jurydyčnuju padtrymku, – dadaje Anton Surapin.
Nahadajem, što ŭ 2012 hodzie žurnalist bolš za miesiac pravioŭ u śledčym izalatary KDB pa spravie ab «šviedskich plušavych miadźviedzikach». Tady Antona Surapina źvinavacili ŭ padrychtoŭcy niezakonnaha pierasiačeńnia dziaržaŭnaj miažy šviedami, chacia žurnalist prosta pieršym raźmiaściŭ fotazdymki «plušavaha desantu» na svaim sajcie. Pra spynieńnie kryminalnaha pieraśledu Antona Surapina KDB aficyjna abjaviŭ u červieni 2012 h. Aryšt Surapina ŭznačaliŭ dziasiatku samych absurdnych aryštaŭ hoda ŭ rejtynhu Amnesty International.
