Čatyry z šaści členaŭ delehacyi Biełarusi ŭ PA ABSIE prahałasavali za vynikovuju dekłaracyju minskaj siesii asamblei. Častkaj hetaha dakumienta stała ŭkrainskaja rezalucyja z asudžeńniem «ahresii Rasii suprać Ukrainy» i «časovaj akupacyi Kryma i Sievastopala». Tolki dva biełaruskija parłamientaryi prahałasavali suprać Minskaj dekłaracyi, piša Tut.by.
U prajekcie rezalucyi zajaŭlajecca «pra asudžeńnie časovaj akupacyi Aŭtanomnaj Respubliki Krym i horada Sievastopala Rasijskaj Fiederacyjaj i hibrydnaj ahresii Rasii suprać Ukrainy na Danbasie».
PA ABSIE nastojliva zaklikaje Rasiju «spynić spansavańnie terarystyčnaj dziejnaści va Ukrainie z dapamohaj prytoku bajevikoŭ, hrašovych srodkaŭ i zbroi praź nie padkantrolny ŭradu ŭčastak ukrainska-rasijskaj dziaržaŭnaj miažy»
Historyja pytańnia takaja. Spačatku ŭkrainskija deputaty 6 lipienia prapanavali ŭklučyć u paradak dnia siesii PA ABSIE rezalucyju «Adnaŭleńnie suvierenitetu i terytaryjalnaj cełasnaści Ukrainy». Usie 36 punktaŭ dakumienta rasijski bok nazvaŭ «chłuśnioj».
Biełaruskaja delehacyja tady ŭstrymałasia pry hałasavańni. U padtrymku Rasii vystupiła tolki Armienija. Ukrainskuju rezalucyju pastavili na paradak dnia.
Na nastupny dzień, 7 lipienia, kali prymali rezalucyju, Valeryj Varaniecki — adziny deputat, jaki hałasavaŭ ad Biełarusi, taksama ŭstrymaŭsia. Astatnija biełaruskija delehaty nie ŭdzielničali ŭ hałasavańni.
— Biełaruś naŭmysna nie ŭdzielničała ŭ abmierkavańni hetaj rezalucyi i ŭstrymałasia pry hałasavańni. Heta zroblena tamu, što my źjaŭlajemsia miratvorčaj placoŭkaj jakraz dla vyrašeńnia hetych pytańniaŭ. Heta naša ŭśviadomlenaja pazicyja zachavańnia niejtralitetu, — prakamientavaŭ tady Valeryj Varaniecki ŭ razmovie z žurnalistam BiełaPAN.
Siońnia, 9 lipienia, plenarnaje pasiadžeńnie PA ABSIE pavinna było pryniać vynikovuju Minskuju dekłaracyju, častkami jakoj stali ŭsio uchvalenyja za čas siesii rezalucyi.
Biełaruski deputat Varaniecki čarhovy raz vystupiŭ suprać raniej uchvalenaj u Kamitecie pa pravach čałavieka rezalucyi ab stanoviščy va Uschodniaj Jeŭropie. U joj krytykavałasia situacyja z pravami čałavieka ŭ Biełarusi, Rasii i Azierbajdžanie. Pytańnie pastavili na dadatkovaje hałasavańnie.
Hałasy padzialilisia 43 na 43, staršynia Kryścin Mutanien PA ABSIE nazvała hetuju situacyju niezvyčajnaj, ale pakolki bolšaści nie nabrałasia — krytyčnuju ŭ adnosinach da Minska rezalucyju vyklučyli z vynikovaha dakumienta. Biełaruskija delehaty vinšavali adzin adnaho, niekatoryja ich kalehi ŭ zale taksama plaskali ŭ dałoni.
Zatym pačałosia hałasavańnie pa ŭsim tekście vynikovaha dakumienta, uklučajučy ŭkrainskuju i ŭsie astatnija uchvalenyja raniej rezalucyi. Čatyry biełaruskija delehaty — deputaty Valeryj Varaniecki, Volha Papko i Balasłaŭ Pirštuk, a taksama sienatar Siarhiej Rachmanaŭ prahałasavali za. Sienatar Siarhiej Hajdukievič i deputat Andrej Rybak — suprać. Akramia ich, suprać prahałasavała ŭsia rasijskaja delehacyja.
Siarhiej Hajdukievič u kamientary TUT.BY zapeŭniŭ, što členy biełaruskaj delehacyi nie damaŭlalisia pamiž saboj ab adzinaj pazicyi — kožny hałasavaŭ, jak ličyŭ patrebnym.
— Ja nie moh pastupić pa-inšamu, tamu što ja palityk, jaki pracuje ŭ intaresach našaj dziaržavy. A dla Biełarusi važna i być u dobrych stasunkach z Rasijaj, i narmalna pracavać ź Jeŭrapiejskim sajuzam, — prakamientavaŭ svaju pazicyju Siarhiej Hajdukievič.
Na jaho dumku, vyklučanaja z vynikovaha tekstu rezalucyi krytyka Biełarusi — nie padstava dla radaści. A sihnał da taho, što našaj krainie nieabchodna praciahvać dyjałoh z partniorami pa sprečnych pytańniach.
Usiaho ŭ zale nabrałasia 15 hałasoŭ suprać Minskaj dekłaracyi. 91 delehat padtrymaŭ jaje, 3 — ustrymalisia. Siesija PA ABSIE prachodziła ŭ biełaruskaj stalicy z 5 pa 9 lipienia.
