Letaś u bresckaj balnicy pamierła niekalki dziaciej: asobnyja baćki pryniali hora i śmirylisia, niekatoryja — pajšli ŭ śledčyja orhany i ŭ kamisii ministerstva, bo ličyli, što dzicia možna było vyratavać. U pryvatnaści, była takaja historyja siamji Doŭhaniaŭ, jaki zhubili 11-miesiačnuju dačku Jevu.
«My prasili pra pieravod u Minsk u centr «Maci i dzicia», ale nam adkazvali, maŭlaŭ, tam niama miescaŭ i budzie takoje samaje lačeńnie. Ale jakoje lačeńnie? Nam davali «Ibuprafien», śviečy «Cefiekon» i zrabili lityčnuju injekcyju. Chirurh da nas nie pryjšoŭ — ja sama z dačkoj padymałasia da jaho na piaty dzień, kab źniać švo ad hidratoraksa. Na šostyja sutki zaprasili dziažurnaha reanimatołaha Snarskaha, jaki, urešcie, paćvierdziŭ fakt sutarhaŭ. Na prośby ich kupiravać doktar adździaleńnia nie reahavaŭ. Zahadčyca adździaleńnia praciahvała lačeńnie žarapanižajučymi, mianiajučy preparaty i daziroŭki. Kančatkovaha dyjahnazu da hetaha času nie było, tolki pracoŭnaja viersija — encefalit. Paśla čarhovaha kansiliumu byŭ pryznačany «Dapakin» dla źniaćcia sutarhaŭ. Praź dzień u dziciaci pačaŭsia flebit, jaho pieraviali ŭ reanimacyju. Kali ž my ŭrešcie nastajali na pieravodzie ŭ Minsk, to reanimatołah paviedamiŭ nam, što pieravod naŭrad ci adbudziecca, bo pačaŭsia aciok lohkich. Dačka pamierła. Jana miesiac hareła ad tempieratury, biez adpaviednaha lačeńnia abo pieravoda da bolš kampietentnych śpiecyjalistaŭ», — raskazała «Našaj Nivie» žančyna. Jana taksama narakała na abychodžańnie ź dziciom — u jaho źjavilisia proležni.
Padrabiazna hetuju historyju možna pačytać tut: U bresckaj dziciačaj balnicy pamierła niekalki dziaciej — siamja raspaviała padrabiaznaści
Siamja źviartałasia ŭ śledčyja orhany i ŭ Ministerstva achovy zdaroŭja, chadziła na pryjom da ministra.
I voś stali viadomy vyniki: Śledčy kamitet parušeńniaŭ u rabocie bresckich miedykaŭ nie vyjaviŭ, ale kanstatavaŭ «niedachopy ŭ arhanizacyi dynamičnaha nazirańnia za dziciom, parušeńni normaŭ etyki i deantałohii, niedachopy ŭ viadzieńni miedycynskaj dakumientacyi».
«Stan [dziciaci] nie vyklučaŭ mahčymaści transpartyroŭki ŭ miedycynskuju ŭstanovu Minska. Adnak, uličvajučy charaktar baleźnienych źmianieńniaŭ, jakija mielisia ŭ Doŭhań Je.V, ekśpiertnaja kamisija ličyć, što pieravod nie zmoh zrabić adčuvalnaha ŭpłyvu na sychod zachvorvańnia», — havorycca ŭ aficyjnych papierach.
«Pry akazańni dapamohi ŭ poŭnaj miery vytrymany roznaŭzroŭnievy pryncyp akazańnia miedycynskaj dapamohi ŭ adpaviednaści z pakazańniami. Abśledavańnie dziciaci było praviedziena na vysokim uzroŭni ŭ abłasnych ustanovach achovy zdaroŭja, zhodna z profilem jaho zachvorvańnia. Da akazańnia miedycynskaj dapamohi pryciahvalisia vysokakvalifikavanyja śpiecyjalisty», — havorycca ŭžo ŭ vypiscy z balnicy.
Admietna, darečy, što ad čaho ž pamierła dzicia ŭ vyniku tak i nie jasna: «dehienieratyŭnaja chvaroba niervovaj sistemy».
