Ranicaj 9 žniŭnia dachaty da ŭsich śviedak, jakija admovilisia ad raniej dadzienych pakazańniaŭ pa spravie niezaležnaha prafsajuza REP, pryjechała milicyja.
Hetuju infarmacyju paviedamiła «Salidarnaści» krynica ŭ prafsajuzie:
- Ich prymusova zabrali ŭ prakuraturu. Adna žančyna nie chacieła adčyniać dźviery. Joj pryhraziŭ učastkovy: budziem łamać dźviery.
Surazmoŭca dapoŭniŭ, što śviedak nie papiaredzili ab vykliku ŭ prakuraturu zahadzia - tamu jany zastalisia biez padtrymki advakata.
- Tak, ludziej sapraŭdy previentyŭna pryvieźli ŭ prakuraturu Minska. Biez pozvaŭ, bieź ničoha, - prakamientavaŭ «Salidarnaści» situacyju kiraŭnik prafsajuza REP Hienadź Fiadynič za niekalki chvilin da pačatku čarhovaha dnia suda. - Prosta zabrali i pavieźli: kaho učastkovy, kaho ludzi ŭ cyvilnym.
Pa majoj infarmacyi ŭ prakuraturu dastavili troch čałaviek - Hierasimienka, Jesipovič i Hryncevič. Sprava ŭ tym, što jany admovilisia ad svaich pieršapačatkovych pakazańniaŭ, tamu sud pastanaviŭ, kab prakuratura apytała ich na pradmiet, jaki cisk na ich byŭ akazany daznavalnikami, - prakamientavaŭ situacyju jon.
9 žniŭnia ŭ sudzie praciahvajecca razhlad spravy prafsajuza REP - kiraŭnika arhanizacyi Hienadzia Fiadyniča i hałoŭnaha buchhałtara Ihara Komlika abvinavačvajuć u niezakonnym atrymańni srodkaŭ na rachunak u zamiežnym banku «z metaj asabistaha ŭzbahačeńnia».
