Pra źniknieńnie kryžoŭ Svabodzie paviedamiŭ adzin ź lideraŭ pikietavańnia restaracyi «Pojediem pojedim», sustaršynia BCHD Pavał Sieviaryniec, piša «Radyjo Svaboda».
Fota: Nadzieja Bužan.
Źnikli try z čatyroch biełych kryžoŭ, jakija stajali za płotam na terytoryi Kurapataŭ z zachodniaha boku, dzie mieścicca restaracyja.
«Vidać, heta było zroblena siońnia ŭ pieršaj pałovie dnia ci nočču, bo trava i kvietki, jakija byli vakoł kryžoŭ, vykapanyja, ale jašče nie zasochli», — ličyć Sieviaryniec.
Źnikłyja kryžy byli dobra vidać ad uvachodu ŭ restaracyju «Pojediem pojedim», a taksama z kalcavoj aŭtadarohi, adznačyŭ Sieviaryniec.
«Albo ŭsio ž adbyvajecca horšaje, pra što my šmat razoŭ kazali, — što Kurapaty pa-cichamu, pa kryžu, ale pastupova źniščać na zahad uładaŭ. Albo heta niečaja samadziejnaść. Nie vyklučaju, što i kahości z restaracyi, bo ad jaje hetyja kryžy byli dobra bačnyja, što nazyvajecca, mulali voka, a ciapier im stała «čyściej». Ale ŭ lubym vypadku nivodzin fakt vandalizmu ŭ Kurapatach da kanca nie raśśledavany, voś razbureńnie memaryjału i praciahvajecca», — miarkuje Pavał Sieviaryniec.
Atrymać kamentar u Baraŭlanskim speclashasie, jaki adkazvaje za terytoryju, nie ŭdałosia — nichto nia ŭziaŭ słuchaŭku.
