Staršynia CVK Lidzija Jarmošyna nie pabačyła pahroz u zhadkach Łukašenki pra rasstreły ŭ Andyžanie. Pra heta havorycca ŭ aficyjnym adkazie na list minčuka, jaki prasiŭ nie rehistravać Alaksandra Łukašenku kandydatam u prezidenty, pieradaje «Jeŭraradyjo».
Minčuk napisaŭ zvarot z nahody vystupu Łukašenki 4 červienia. Aŭtar zvarotu ličyć, što kiraŭnik dziaržavy «prama ci ŭskosna kazaŭ pra ŭžyvańnie hvałtu da inšadumcaŭ, pryvodziačy prykłady Uźbiekistana i Tadžykistana z masavymi rasstrełami».
Padstavaj dla hetaha jon nazvaŭ frazu: «Zabyli, jak były prezident Karymaŭ u Andyžanie zdušyŭ putč, rasstralaŭšy tysiačy čałaviek? Usie asudžali jaho, a kali pamior — na kaleniach stajali, hałasili-płakali. My hetaha nie pieražyli, tamu my hetaha razumieć nie chočam — niekatoryja. Nu dyk my nahadajem».
Frazu «Krainu jany nie atrymajuć» minčuk kvalifikavaŭ jak pahrozu ŭzurpiravać uładu. «Ci maje prava kandydat u prezidenty takoje zajaŭlać? Heta vielmi niebiaśpiečnyja zajavy, pahrozy ŭžyvańnia siły suprać biełaruskaha naroda ŭ vypadku, kali narod abiare inšaha kandydata», — adznačyŭ aŭtar zvarotu.
Na jaho dumku, kiraŭnik Biełarusi vykarystoŭvaŭ słužbovaje stanovišča ŭ intaresach abrańnia, čym parušyŭ artykuł 73 Vybarčaha kodeksa. Tamu jon paprasiŭ nie rehistravać Łukašenku kandydatam u prezidenty.
U svaim adkazie Lidzija Jarmošyna zajaviła, što Łukašenka jak harant Kanstytucyi «abaviazany prymać usie miery, u tym liku i siłavyja, dla abarony dziaržaŭnaha ładu i pravaparadku, pra što jon emacyjna vykazaŭsia».
A ŭsie acenki hetaha vystupu jana nazvała biespadstaŭnymi: «Vašy zdahadki pra pahrozy subjektyŭnyja i nie hruntujucca na źmieście dadzienych vystupaŭ».
Staršynia CVK padkreśliła, što ŭ Vybarčym kodeksie jość dakładny pieralik prykmiet złoŭžyvańniaŭ słužbovym stanoviščam u metach vyłučeńnia i abrańnia. Vykazvańni słužbovych asob na pracoŭnych sustrečach nie ličacca takim złoŭžyvańniem, tamu zvarot źjaŭlajecca nieabhruntavanym.
