Paśla čatyroch dzion u izalatary časovaha ŭtrymańnia žycharcy Homla Tacianie Bačurnaj prysudzili bujny štraf, piša Svaboda.
Biełaruskaje zakanadaŭstva nie dazvalaje karać žančyn ź niepaŭnaletnimi dziećmi administracyjnym aryštam.
Ale tut ułady parušyli i jašče adnu normu — takich žančyn nielha zatrymlivać bolš jak na 72 hadziny.
«Heta svavola našaj milicyi. Apošnim časam siłaviki złoŭžyvajuć pravam na administratyŭnaje zatrymańnie, voziačy ŭ izalatar navat maci, jakija majuć małych dziaciej. Jość rašeńnie Kamitetu pa pravach čałavieka AAN pa Biełarusi, dzie našym uładam ukazvajuć na toje, što 48 hadzin dastatkova, kab padrychtavać čałavieka da sudu», — ličyć pravaabaronca Leanid Sudalenka.
Taciana Bačurnaja vychoŭvaje 7-hadovaha syna. Jaje mužu ŭ piatnicu prysudzili 15 sutak. Stolki ž atrymała siońnia jaje ciocia — nastaŭnica Iryna Zacharčanka.
Milicyja skłała na Tacianu dva pratakoły — za niesankcyjanavanyja akcyi 27 vieraśnia i 21 kastryčnika. Žančyna admaŭlaje, što ŭdzielničała ŭ mitynhu 27 vieraśnia. Jana taksama nia ličyć, što fatahrafavańnie z nacyjanalnym ściaham 21 kastryčnika — heta pikiet.
«27 vieraśnia ja z mužam była ŭ centry horadu. My sustrelisia ź ciociaj, chadzili pa centry horadu, u mitynhu nia ŭdzielničali», — patłumačyła Taciana.
Sudździu Alaksandra Zinčuka cikaviła, čamu Taciana išła ź ciociaj pa vulicach Kirava i Iryninskaj, a nie, naprykład, pa praspekcie Pieramohi. Sudździa skazaŭ, što taki maršrut «biessensoŭny».
Suprać Taciany śviedčyli milicyjanty, u tym liku ŭčastkovy. Sud pakaraŭ jaje štrafam u 810 rubloŭ.
