Na minułym tydni ŭniviersitety pačali adličać aktyŭnych studentaŭ. U Biełaruskim dziaržaŭnym miedycynskim univiersitecie, pa infarmacyi navučencaŭ, pad razdaču trapiŭ 21 čałaviek.
Adzin ź ich — druhakurśnik piedyjatryčnaha fakulteta Jan Šlapo.
Fota z sacsietak
«Prablem z vučobaj u mianie nie było. Jak i va ŭsich, kaho adličyli, nakolki viedaju. Adličyli z pryčyny «sistematyčnaha parušeńnia praviłaŭ unutranaha rasparadku», — raskazvaje chłopiec.
Pa jaho słovach, jość nadzieja, što studentaŭ mohuć uznavić va ŭniviersitecie — kali jany vybačacca i pierastanuć udzielničać u pratestnych akcyjach.
Admietna, što maci Jana — staršynia Vilejskich rajonnych prafsajuzaŭ Volha Šlapo. Pierad vybarami jana sustrakałasia z Natallaj Ejsmant padčas jaje vizitu ŭ rehijon.
Fota z sacsietak
«Jaki cikavy čas pieražyvajem. Stolki adčuvaju roznych emocyj ad taho, što adbyvajecca: aburajusia, kali «apazicyjnyja» krytyki ahresiŭna padkreślivajuć niedachopy našaha žyćcia i staranna nie zaŭvažajuć jaho dobrych jakaściaŭ, stvarajuć chvalu abureńnia ŭ dušach ludziej, kab na hetaj chvali ŭjechać va ŭładu i paśla «krychu pieraraźmierkavać resursy», — pisała Volha pra vybary. — Sustreča z Natallaj Ejsmant dla mianie — padzieja. Adčuła jaje charyzmu, sapraŭdny pres-sakratar — talenavitaja, razumnaja, pryhožaja, u kožnym słovie — siła žyćcia, upeŭnienaść».
Palityčnyja pohlady syna maci nie padzialaje i ciapier.
«Nastojvała na tym, što ja sam vinavaty i mnie treba kajacca, ale pry hetym rabiła ŭsio mahčymaje i niemahčymaje, kab mnie dapamahčy, pisała chadajnictva, — adznačaje Jan. — Ja sprabavaŭ pierakanać mamu ŭ pohladach, ale naŭrad ci heta ŭ kaho atrymajecca. Samy papularny jaje arhumient — stabilnaść. Maŭlaŭ, niama vajny i žyviecca niabłaha».
Jan akcyi pratestu padtrymaŭ, bo nadakučyła maŭčać.
«Kožny dzień ja čytaju naviny ab zatrymańniach, źbićci i katavańniach. Ja baču hrebavańnie zakonam z boku ŭładaŭ i naohuł niespraviadlivaść. Tamu ja pajšoŭ bastavać», — dzielicca chłopiec.
Jak stała viadoma «Našaj Nivie», Jana ŭsio ž adnavili va ŭniviersitecie. U paniadziełak jaho vyklikali ŭ dekanat i znoŭ uručyli studencki bilet.