Staršynia Kamiteta dziaržkantrolu Vasil Hierasimaŭ. Fota: pres-słužba KDK
Navošta KDK uvohule hetyja inśpiektary? Va ŭkazie Łukašenki adznačajecca: u metach zabieśpiačeńnia sacyjalnaj aktyŭnaści hramadzian, udaskanalvańnia form i mietadaŭ hramadskaha kantrolu i dla pavyšeńnia apieratyŭnaści i efiektyŭnaści mierapryjemstvaŭ, jakimi zajmajecca Kamitet. Hrošy na heta vydzialać ź biudžetu.
Inśpiektary buduć pryviazanyja da terytaryjalnych orhanaŭ KDK pa ŭsioj krainie. Ich buduć pryciahvać na analityčnyja i kantrolnyja mierapryjemstvy, jakija pravodziać padraździaleńni Kamiteta. I mohuć navat dapuścić da achovanaj infarmacyi, praŭda, daviadziecca padpisać abaviazacielstva ab nierazhałošvańni. Jak i družyńnikam, inśpiektaram KDK vydaduć paśviedčańni.
Varta adznačyć, što patrabavańni da takich inśpiektaraŭ vyšejšyja, čym da milicejskich pamočnikaŭ. Tak, KDK hatovy supracoŭničać z kandydatami ad 25 hadoŭ, z vyšejšaj, siarednie-śpiecyjalnaj ci prafiesijanalna-techničnaj adukacyjaj, dadatkova aceniać asabistyja i dziełavyja jakaści kandydataŭ.
U inśpiektary nie voźmuć tych, u kaho byli prablemy z zakonam, navat kali ciaham hoda było ŭsiaho adno administratyŭnaje pravaparušeńnie (luboje, navat parušeńnie PDR).
Fiederacyja prafsajuzaŭ i inšyja hramadskija abjadnańni mohuć pradastavić u KDK śpis svaich naminantaŭ.
Nichto nie vyzvalić inśpiektaraŭ ad asnoŭnaj pracy, dapamahać KDK jany pavinny ŭ svoj volny čas. Kamitet moža, ale nie abaviazany płacić hrošy takim pamočnikam.
Heta budzie vyrašacca naprykancy kalandarnaha hoda. Maksimum, na što moža raźličvać inśpiektar, — 20 bazavych vieličyń (na siońnia heta 580 rubloŭ). Tym, chto za hod asabliva adznačyŭsia, mohuć źvierchu prypłacić da 10 b. v. (na siońnia heta 290 rubloŭ). Jaki abjom raboty pry hetym daviadziecca vykanać, urad nie prapisaŭ.
