«Hałoŭnaja zadača ŭrada ŭ cełym i Ministerstva antymanapolnaha rehulavańnia i handlu zaklučajecca ŭ pavyšeńni prybytkaŭ nasielnictva, a nie ŭ administratyŭnym strymlivańni cen», — z takoj rytorykaj Kałtovič pryjšoŭ u ministerskaje kresła pry kancy 2015-ha.
Vyraŭniać umovy kankurencyi miž pryvatnym i dziaržaŭnym siektaram, źniać barjery, jakija zaminajuć biznesu raźvivacca, pahadzicca z tym, što rynak — hałoŭny rehulatar. Voś takija byli jaho ŭstanoŭki.
Za 6 hod vyhadavaŭ vakoł siabie plejadu libierałaŭ
Na pasadu ministra Uładzimir Kałtovič pryŭšoŭ u 49 paśla taho, jak užo pabyŭ namieśnikam ministra, potym namieśnikam staršyni Minharvykankama i navat savietnikam ambasady ŭ Rasii.
«Jon nie bajaŭsia adstojvać svaju pazicyju, adkryta i śmieła, a jana ŭ jaho časta išła nasupierak hienieralnaj linii. Ale adstojvaŭ jon jaje tolki da momantu pryniaćcia rašeńnia. Jak tolki prymałasia rašeńnie kalehijalnaje, u Saŭminie, ci rašeńnie Łukašenki, Kałtovič-rynačnik pieraŭtvaraŭsia ŭ Kałtoviča-vykanaŭcu, jaki vykonvaŭ usio, navat vidavočnuju bzduru», — havoryć pra jaho były kaleha.
A inšyja kalehi śćviardžajuć, što Kałtovič — viecha.
«Pry Kałtovičy vyrasła i była im vychavanaja novaja hienieracyja maładych čynoŭnikaŭ, jakija adroźnivajucca ad kłasičnaha ŭzoru biełaruskaha čynoŭnika peŭnym intelektam, sučasnaściu, śvietłym prykładam pierad vačyma. Zrešty, mienavita jany słuchali toje, što Kałtovič nie moh skazać adkryta ŭ inšych kabinietach», — kaža nam adzin sa słužačych Saŭmina.
Mieŭ čałaviečaje abličča
Kałtovič byŭ paznavalnym ministram, mieŭ nie tolki administratyŭna-biazdušny, ale čałaviečy vobraz. Heta prykład vysokaha čynoŭnika, jaki moh iści na rabotu pieššu, nie chavać tvar u kramie.
Fota: ułasnaja staronka Uładzimira Kałtoviča ŭ Facebook
Ministr vioŭ staronku ŭ Facebook, dzie vykładaŭ fotazdymki z maci i dziećmi, fota z pachodaŭ u hory i svaich dvuch katoŭ.
Katy Kałtoviča. Fota: staronka byłoha ministra ŭ Facebook
Tak vyśvietliłasia, što ministr jeździć na «Folksvahien Holf», žyvie ŭ panelcy na Žukoŭskaha i nie maje škłopakietaŭ na voknach.
A jaho sełfi ŭ vyšyvancy ablacieła ledź nie ŭsie ŚMI.
Fota: «Radyjo Svaboda»
Chiba što, mnohija zadavalisia pytańniem, pa jakich takich matyvach adukavany, libieralny i talenavity čałaviek pajšoŭ nie ŭ pryvatny biznes, a ŭ čynoŭniki. Bolš za toje — zastaŭsia tam paśla žniŭnia 2020-ha.
Nie davaŭ «Jeŭraoptu» stać manapalistam, ale nie zmoh pieramahčy «Biełavija»
Pieršaj pieramohaj Kałtoviča na pasadzie ministra była pieramoha nad MUS i Minzdaroŭja ŭ admienie abmiežavańniaŭ na handal ałkaholem. Viadoma, sprečna z maralnaha boku, ale varta apładysmientaŭ z boku rytejłu.
Hetym jon spačatku padkupiŭ rynak, ale potym i pierastaŭ padabacca častcy hulcoŭ.
Sprava ŭ tym, što pry Kałtovičy ministerstva handlu atrymała i dadatkovyja funkcyi antymanapolnaha rehulavańnia. Tak Kałtovič staŭ pieršym ministram, jaki zmahaŭsia z manapolijami.
Mienavita pry Kałtovičy «Biełtelekam» i «Biełpošta» pierastali być naturalnymi manapolijami i da ich taksama stali prymianiać antymanapolnaje zakanadaŭstva. Adnak «demanapalizavać» «Biełavija» ci Biełaruskuju čyhunku MARH tak i nie zmoh. Chacia Kałtovič prapanoŭvaŭ heta zrabić. Tamu łoŭkosty ŭ Biełaruś tak i nie pryjšli.
Ale samy zapaminalny kiejs MARHa — supraćstajańnie z «Jeŭratorham». Kampanija spačatku cisnuła na toje, kab u je-dastaŭcy źjaviŭsia ałkahol i cyharety. Kałtovič vystupiŭ kateharyčna suprać.
Potym «Jeŭratorh» nastojvaŭ, kab pierahledzieli ŭmovy pryznańnia kampanij manapalistami. Bo jaho doła rynku ŭžo nabližałasia da krytyčnaj, paśla jakoj «Jeŭratorh» mahli b pryznać manapalistam. Paśla byŭ sud z «Jeŭratorham», jaki MARH złaviŭ na niadobrasumlennaj kankurencyi. Sud vyjhrała Ministerstva.
U vyniku kampanija, što maje 900 mahazinaŭ, admoviłasia ad płanaŭ pa pašyreńni.
«I tak zajmajuć maksimalna mahčymuju častku rynka», — kazaŭ Kałtovič.
Praz heta, imavierna, u «Jeŭratorha» nie atrymajecca vyjści na brytanskaje IRO. Bo inviestara treba pierakanać u mahčymaściach rostu, ale nichto nie pavieryć u mahčymaść dalejšaha pašyreńnia «Jeŭraopta» praz strohuju palityku MARH.
Uvieś čas Kałtovič sutykaŭsia z žorstkaj apazicyjaj z boku bujnoha rytejła, jaki pisaŭ va ŭsie instancyi: «Dziaržava patrabuje ad nas zaniataści i vypłat siaredniaha zarobku! A tolki vialikija sietki mohuć heta dać! Nas abmiažoŭvajuć, my nie zmožam vykonvać abaviazki pierad dziaržavaj!».
Što praŭda, Kałtovič dla biźniesu byŭ nie tolki miačom, ale i ščytom.
«Kali prychodzili da jaho sa skarhami, jon zaŭsiody ŭzvažvaŭ i arhumienty, i fakty, i nastupstvy, pierad tym jak dać adkaz. Kali analiz pakazvaŭ, što treba abaranić — abaraniaŭ, — adznačyŭ adzin z rytejleraŭ. — Pry hetym, nichto nie papraknie jaho, jak niekatorych inšych ministraŭ, što jon dziejničaŭ u intaresach niejkich hrup. Jon byŭ roŭnaaddaleny ad usich asnoŭnych centraŭ siły, moža, tamu i vyhladaŭ zaŭsiody biełaj varonaj».
Fota: staronka Uładzimira Kałtoviča ŭ Facebook
Miž tym, jak adznačajuć našy surazmoŭcy ŭ rytejle, zachoŭvałasia praktyka vypadkovych štrafaŭ vypadkovym kampanijam, dla svajho rodu imitacyi baraćby z manapalizmam.
«Na Kałtoviča trymajuć vialikuju kryŭdu roznaha rodu pradaŭcy bytavoj techniki i sotavyja apieratary. Druhim jon nie davaŭ padymać ceny na pasłuhi, a pieršych pakryŭdziŭ tym, što ofłajnavy handl jasna i zrazumieła adrehulavany, ale internet-handl — nie. Za košt čaho cierpiać sumlennyja pradaŭcy», — ličać našy surazmoŭcy.
Sprabavaŭ rynačnyja miechanizmy ŭ «płanavaj» ekanomicy
Pry Kałtovičy zachoŭvaŭsia prymusovy kurs na štučnuju kankurencyju, najbolš jaskrava možna prailustravać heta na prykładzie impartu ałkaholu.
Jak raskazali «Našaj Nivie» krynicy ŭ rytejle, u Biełarusi vyznačajecca šerah kampanij, jakija mohuć uvozić ałkahol pa kvotach. Istotnyja abjomy kvot časta dastavalisia tym dziaržaŭnym arhanizacyjam, jakija takich abjomaŭ nikoli nie zmohuć nie toje što pradać, bo niama dzie, ale navat uvieźci — bo niama za što.
«A čamu heta rabiłasia? Kab roznaha rodu «bakalei» potym pradavali svaju kvotu narmalnym pryvatnym pradaŭcam. Dla padtrymki štanoŭ, praściej kažučy», — havoryć naš surazmoŭca.
Z pazityvu: Kałtovič sprabavaŭ źniać abmiežavańni na handl syravinaj. Piłotny prajekt — handl małakom na biržy.
«Z adnaho boku — dobra, bo birža. Ź inšaha — vystavicca na jaje moža tolki nievialikaja častka haspadarak, u jakich niama daŭhoŭ pierad bankami i abaviazkaŭ pierad miascovym vykankamam. U vyniku ceny zaŭsiody pavyšanyja, — kaža adzin z udzielnikaŭ tarhoŭ. — Nielha być trošku rynačnikam u płanavaj ekanomicy».
Niezaležna ad taho, što Kałtovič sprabavaŭ rabić raniej, bolš za ŭsio jon zapomnicca dziejańniami MARH za apošnija paŭtara hoda: baraćboj z cenami administratyŭnymi mietadami.
Pastanaŭleńni ab rehulavańni cen vydavaŭ jak Saviet ministraŭ, tak i MARH. Heta pryviało i pryvodzić da źmianšeńnia asartymientu, a ŭ pierśpiektyvie heta jašče pryviadzie da deficytu. Naprykład, tłustaha małaka — vytvorcy prosta pradajuć jaho ŭ Rasiju, bo tak vyhadniej.
MARH adčytvajecca, što za 2020-2021 hady achapiŭ svaim kantrolem pad pałovu rynka tavaraŭ i pasłuh. Ale što ŭ vyniku? Inflacyja ŭsio adno samaja vysokaja ŭ rehijonie. Praŭda, pracent achopu staŭ trochu nižejšy, čym pry papiarednikach.
Rytejł stavić u vinu Kałtoviču zachavańnie «asartymientnaha pieraliku», hetaha anachranizmu časoŭ deficytu ŭ SSSR. Niahledziačy na nasadžvańnie hetaha «asartymientnaha pieraliku», dola impartu siarod spažyvieckich tavaraŭ usio adno dasiahnuła histaryčnych maksimumaŭ.
Apošniaje publičnaje vystupleńnie Uładzimira Kałtoviča ŭ roli ministra było jakraz paśla taho, jak Saviet Ministraŭ u adkaz na sankcyi ŭvioŭ «praduktovaje embarha».
«Pryčyna pryniaćcia hetaj pastanovy — sankcyjny cisk na Biełaruś, jaki praciahvajecca, i, pa sutnaści, heta źjaŭlajecca vymušanaj mieraj. Na žal, nam davodzicca reahavać i sprabavać reahavać adekvatna. U suviazi z hetym paśla pryniaćcia piataha pakieta sankcyj uradam było pryniataje takoje rašeńnie», — kazaŭ Kałtovič.
Jon syšoŭ z pasady praz dva tydni paśla hetaj zajavy, 21 śniežnia biahučaha hoda ŭ 55-hadovym uzroście. Ci praciahnie Kałtovič dziaržsłužbu ŭ inšym miescy, pakul nieviadoma.
Čytajcie taksama:
Ad fizruka da kiraŭnika. Piać faktaŭ pra novaha ministra handlu i antymanapolnaha rehulavańnia
