PZRK «Hrom». Fota commons.wikimedia.org.
Brytanski premjer-ministr Borys Džonsan i kiraŭnik polskaha ŭrada Matevuš Maraviecki płanujuć abviaścić padčas vizitu ŭ Kijeŭ pra stvareńnie novaha formatu supracoŭnictva z Ukrainaj. Pra heta piša resurs «Ukrainskaja praŭda» sa spasyłkaj na ŭłasnyja dypłamatyčnyja krynicy.
Čakajuć, što Džonsan i Maraviecki pryjeduć u Kijeŭ adnačasova na hetym tydni. Mahčyma, vizit pačniecca 1 lutaha.
Pakul niama infarmacyi pra toje, jakim budzie farmat. Upieršyniu jaho zhadała kiraŭnica brytanskaha MZS Liz Tras padčas vizitu ŭ Aŭstraliju 21 studzienia. Miarkujučy pa jaje słovach, novy farmat byŭ abhavorany ŭ śniežni minułaha hoda, kali ŭkrainski prezident Uładzimir Zialenski naviedvaŭ Łondan.
U paniadziełak stała viadoma, što praz kryzis vakoł Ukrainy brytanski premjer admianiŭ vizit u Japoniju, zapłanavany na siaredzinu lutaha. Čakajuć, što ŭ bližejšyja dni Džonsan praviadzie razmovu z Uładzimiram Pucinym. Akramia taho, paviedamlajuć, što Džonsan płanuje naviedać krainy Uschodniaj Jeŭropy, kab sprabavać «paźbiehnuć pralićcia kryvi».
Niadaŭna było abvieščana, što Polšča pastavić Ukrainie bieśpiłotniki, PZRK i snarady dla supraćpavietranaj abarony. Dakładny śpis uzbrajeńniaŭ, jakija atrymaje Kijeŭ, stanie viadomy paśla vizitu Maravieckaha va Ukrainu. Ale, jak kaža kiraŭnik polskaha ŭrada, razmova moža iści pra pieranosnyja zienitna-rakietnyja kompleksy «Hrom» i pra bieśpiłotniki dla prymianieńnia ŭ abarončych metach. Maraviecki taksama vykazaŭ hatoŭnaść dapamahčy Ukrainie pradmietami pieršaj nieabchodnaści.