Heta praduhledžana pastanovaj Saŭmina №391 ad 15 červienia, jakaja siońnia aficyjna apublikavana na Nacyjanalnym pravavym internet-partale.
«Abviaścić zaałahičnuju kalekcyju i hienietyčny bank dzikaj faŭny dziaržaŭnaha navukova-vytvorčaha abjadnańnia «Navukova-praktyčny centr Nacyjanalnaj akademii navuk Biełarusi pa bijaresursach» nacyjanalnym zdabytkam», — havorycca ŭ dakumiencie.
Navukovymi abjektami, jakija składajuć nacyjanalny zdabytak, pryznajucca ŭnikalnyja abjekty, jakija nie paddajucca adnaŭleńniu ŭ vypadku razbureńnia abo takija, strata jakich moža mieć surjoznyja niehatyŭnyja nastupstvy dla raźvićcia navuki i hramadstva.
Dziaržaŭny rejestr navukovych abjektaŭ, jakija składajuć nacyjanalny zdabytak, byŭ stvorany ŭ 1998 hodzie.
U pieršuju piaciorku ŭvajšli kalekcyjnyja fondy žyvych raślin i hierbaryj Centralnaha bataničnaha sadu Nacyjanalnaj akademii navuk, hierbaryj Instytuta ekśpierymientalnaj bataniki imia Kupreviča NAN Biełarusi, kalekcyi Muzieja staražytnabiełaruskaj kultury i falkłornaja kalekcyja Instytuta mastactvaznaŭstva, etnahrafii i falkłoru imia Kandrata Krapivy Nacyjanalnaj akademii navuk, a taksama kalekcyja niepatahiennych mikraarhanizmaŭ Instytuta mikrabijałohii NAN Biełarusi.
Paźniej śpis nieadnarazova papaŭniaŭsia — naprykład, kalekcyja virusaŭ i bakteryj, patahiennych dla čałavieka Respublikanskaha navukova-praktyčnaha centra epidemijałohii i mikrabijałohii, a taksama hienietyčny bank bulby navukova-praktyčnaha centra NAN Biełarusi pa bulbavodstvie i płodaaharodnictvie.
