Padatak na pieršuju kvateru źjaviŭsia ŭ abnoŭlenym z 1 studzienia 2022 hoda Padatkovym kodeksie. Zbor składzie 0,1% ad koštu adnaho kvadratnaha mietra. Heta značyć, u roznych rehijonach buduć płacić pa-roznamu. Byŭ prahnoz, što ŭ siarednim padatak u Minsku składzie 50 rubloŭ na hod, a ŭ rehijonach udvaja mienš.
Płatu raźbivajuć na dva razy, spačatku prosiać avans. Naprykład, pa hetaj staličnaj kvatery na Jana Čačota ŭłaśniku pakul vystavili rachunak na 22,27 rubla, heta avans. Tut ža paznačana, što ŭsia suma padatku składzie 44,55 rubla.
Vypłacić padatak treba nie paźniej za 15 listapada 2022 hoda, adznačajecca ŭ paviedamleńni.
Papiera nazyvajecca «paviedamleńnie na vypłatu fizičnymi asobami transpartnaha padatku, padatku na nieruchomaść i ziamielnaha padatku». Heta tamu, što ŭ Biełarusi hetym letam źjaviłasia adzinaja forma płaciožki pa takich hrafach.
Miarkujučy pa letašnim tłumačeńni ad padatkavikoŭ, paviedamleńni pryjduć nie paźniej za 1 vieraśnia 2022 hoda. Paśla vypłaty avansu nastupnuju častku hrošaj treba budzie zapłacić nie paźniej za 15 listapada 2023 hoda. Pra jaje nahadajuć u nastupnym hodzie, taksama da vosieni.
Niekatorych hramadzian ad padatku na pieršuju kvateru vyzvalili. Siarod ich vieterany Vialikaj Ajčynnaj vajny i inšyja ludzi z pravam na lhotnaje padatkaabkładańnie pa zakonie «Ab vieteranach», invalidy I i II hrupy, piensijaniery, šmatdzietnyja, niepaŭnaletnija, a taksama sałdaty terminovaj słužby i tyja, chto prachodzić alternatyŭnuju słužbu.
Adznačałasia, što meta novaŭviadzieńnia takaja: «zraŭniać umovy padatkaabkładańnia hramadzian, jakija źjaŭlajucca ŭładalnikami indyvidualnaha žylla, a taksama pavysić resursnuju bazu miascovych biudžetaŭ». Vynikaje, hrošy, sabranyja z uładalnikaŭ kvater, pojduć u miascovyja biudžety.
