U pačatku nulavych Capkała byŭ datyčny da prasoŭvańnia za miažoj premijalnaj biełaruskaj harełki. Harełku «Mark Šahał» z patretam mastaka i hraviurami Viciebska vypuskaŭ zavod «Minsk-Kryštal» pa zamovie biełaruska-francuzskaha pradpryjemstva «Vuador».
Padrabiaznaści hetaj historyi raniej apisvali Naviny.by. U 2002-m Capkała zarehistravaŭ na siabie damien vodkachagall.com. Kampanijaj «Vuador» kiravaŭ Anatol Bandarčuk. Vysokahradusnaha «Šahała» źbiralisia pastaŭlać u ZŠA, Aŭstraliju, Vialikabrytaniju i Japoniju.
Praŭda, paśpiachovym toj prajekt nie staŭ.
Francuzski «Kamitet Marka Šahała» byŭ suprać vykarystańnia imia mastaka ŭ biełaruskich handlovych markach. Jany ličyli, što harełka pad takim brendam dyskredytuje avanhardysta.
Kamitet padaŭ skarhu na Valeryja Capkału. Jaje razhladaŭ Centr pa arbitražy i pasrednictvie Suśvietnaj arhanizacyi intelektualnaj ułasnaści. Nakolki viadoma, Capkała admoviŭsia ad veb-sajta.
Pres-sakratar palityka Alaksiej Urban u 2020-m kazaŭ žurnalistam Naviny.by, što vytvorčaść harełki tak i nie pačałasia, a damien Capkała rehistravaŭ pa prośbie siabroŭ.
U 2009-m «Vuador» pryznali bankrotam i likvidavali.
Anatol Bandarčuk raskazvaŭ, što, kali Capkała byŭ pasłom u ZŠA, jon dapamoh zarehistravać handlovuju marku, kab naładzić prodaž harełki.
«Moža być, ja tady paprasiŭ jaho zarehistravacca zamiest mianie, ale ja nie pamiataju, tamu što heta było daŭno, — zhadvaŭ jon pra damien. — Ja ŭvieś čas prasiŭ jaho dapamahčy. Jon, tak by mović, byŭ daloki ad harełki, jon bolš lubić vino».
U 2020-m Anatol Bandarčuk byŭ asnoŭnym uładalnikam kampanii Nordcom Global, jakaja śpiecyjalizujecca na raspracoŭcy i padtrymcy ličbavych płatformaŭ, sistem padtrymki pryniaćcia kiraŭničych rašeńniaŭ, a taksama sistem abarony infarmacyi.
Bandarčuk taksama zasnavalnik dabračynnaj arhanizacyi «Mižnarodny fond ličbavaj spadčyny» z ofisam u Kijevie. Meta fondu — abličboŭka i zachavańnie kulturnaj spadčyny čałaviečaj cyvilizacyi, a taksama stvareńnie ŭmoŭ dla jaho dalejšaha daśledavańnia.
Valeryj Capkała supracoŭničaŭ z abiedźviuma strukturami Anatola Bandarčuka, adznačali žurnalisty. Na sajcie fondu jon byŭ paznačany jak kiraŭnik naziralnaj rady (ciapier sajt nie dastupny). Na sajcie Nordcom Global zhadvajecca ŭ liku mieniedžaraŭ ekśpiertnaj hrupy.
Čytajcie taksama:
Što za fond «Biełaruś budučyni», zasnavalnikam jakoha fihuravaŭ Capkała z achviaravańniami nibyta na čatyry miljony dalaraŭ?
