Pra što havorka?
Kali emocyi sychodziać, achviary razvodziać rukami: jak možna było ŭ heta pavieryć? Machlarstva padajecca jak novaja technałohija ŭ e-commerce. Nibyta kramy i handlovyja płatformy (nakštałt ni mnoha ni mała Amazon) nie spraŭlajucca z patokam klijentaŭ — im patrebnaja dapamoha ŭ rehistracyi i vykanańni zakazaŭ. Za heta vy atrymajecie pracent. Paśla padłaščvańnia ŭ vyhladzie nievialikich zarobkaŭ sistema pryvodzić achviaru da pavyšeńnia stavak. Bajučysia stracić užo vydatkavanaje, ludzi zhadžajucca na ŭsie vialikija vydatki.
Bella, Amazon i Alaksandr
U tyktok inžynieru-elektryku Alaksandru pryjšło paviedamleńnie ad Bella. Jana pradstaviłasia, skazała, što ź Sinhapura i što joj 29 hadoŭ, i paciahnuła ŭ telehram. Tam razmova pajšła pra rabotu.
— U čym sutnaść pracy? Vykonvaješ zamovy pakupnikoŭ. Štory, kaśmietyka, drony — što zaŭhodna. Zamova na $10 — ty płaciš, potym krama viartaje tabie hetyja hrošy ź nievialikaj kamisijaj, — tłumačyć Alaksandr.
Bella pradstaviła płatformu, jakaja nibyta pracuje z Amazon. Usie ździełki virtualnyja, heta nie chavajecca. Navošta? Dla nakrutki kolkaści prodažaŭ i rejtynhu kramy, jaki dazvolić joj zarablać bolš užo z realnymi klijentami.
Heta poŭnaja vydumka, ale ŭ teoryi dla mnohich ludziej hučyć jak mahčymaja praŭda.
Paśla rehistracyi Bella/sistema kidaje trochi stejbłkoinaŭ (papaŭnieńnie akaŭnta na płatformie i vyvad hrošaj iduć praz kryptakašalok) dla startu, a dalej siadzi i klikaj, vykonvajučy abjom pracy. Treba vykanać (kliknuć) 60 zakazaŭ — heta pakiet. Paśla hetaha možna vyvieści atrymanyja kamisijnyja.
— Zakaz na $200 — kamisija kala $3, — kaža Alaksandr.
Bella padkazała, jak vyvieści pieršy zarobak, jaki skłaŭ kala 30 USDT. Usio spracavała.
Na nastupny dzień trapiłasia zamova na $680, a na bałansie Alaksandra było $600. Pryjšłosia zakinuć $80. Ale hrošy viarnulisia ŭžo z kamisijaj $25. Za druhi dzień biełarus pakłaŭ na rachunak $200, a viarnuŭ $600. Čatyry sotni čystaha prybytku ŭ krypkašalku — pryjemna.
Nastupiŭ treci dzień, i zamovy padaraželi. Alaksandr viarnuŭ sistemie zaroblenaje ŭčora i dadaŭ jašče. Kali pryjšła zamova na $800, jon usio zrazumieŭ i spyniŭsia.
Golden Ant, Lena i Kacia
Siostry pajšli dalej. Sistema była inšaja. Heta suśvietnaja navinka. Ciapier sajt dastupny pa novym adrasie, tamu zachodzim tolki pahladzieć, rukami ničoha nie čapajcie. Akcent ciapier na iardancaŭ, tamu kantent častki About us łakalizavany.
Zaprašeńnie pryjšło ŭ instahram.
— Zvyčajny profil, fotki nibyta sapraŭdnyja. Nie padumała prahartać da dna — tady b ubačyła, što akaŭnt staŭ zapaŭniacca z červienia hetaha hoda, — uzdychaje Lena. — Ja naohuł zvyčajna takija paviedamleńni navat nie adkryvaju, a tut lohka: nu davajcie, raskazvajcie.
I Roberta na kryvoj ruskaj, ale ź vialikaj empatyjaj pieraciahnuła Lenu ŭ telehram, dzie raspaviała pra novuju płatformu Golden Ant.
Nibyta jość były top z Amazon, jaki sabraŭ inviestycyi i zapuściŭ technałohiju novaha pakaleńnia dla elektronnaj kamiercyi. Nijakich padrabiaznaściaŭ. U zaležnaści ad fokusu ašukancaŭ hety eks-mieniedžar moža być supracoŭnikam nie Amazon, a kampanii z toj krainy, dzie šukajuć achviar, — naprykład, «ź vialikim vopytam pracy ŭ Iardanii».
— Ja stała šukać drennyja vodhuki i ničoha nie znajšła. I dobrych nie było. Naohuł ničoha nie znajšła.
Lena zrazumieła, što joj treba budzie atrymlivać pracent za vykanańnie zakazaŭ — fizična heta aznačaje klikać myškaj.
— U čym sens pracy? Ja razumieła tak: kramy nie paśpiavajuć apracoŭvać zamovy — treba dapamahčy pryniać i apracavać ich. Plus heta pieravod hrošaj u kryptavalutu — dumała, što na hetym možna zarablać.
Roberta ciapier zvali Lina. Jana skazała, jak rehistravacca i što budzie zarablać na Lenie. Na hetuju praŭdu dziaŭčyna ŭvahi nie źviarnuła.
— Ja pačynaju vykonvać zakazy na svajoj staroncy, potym mnie dajuć dostup da inšaj — a tam pracent vyšejšy! Paśla navučańnia jana pakazała mnie, jak vyvieści zaroblenaje, — ura, atrymałasia.
Z dapamohaj pamočnika/pamočnicy Lena zaviała kryptakašalok, navučyłasia karystacca biržaj, vyvodzić USDT, pradavać i zakidvać biełaruskija rubli sabie na kartu.
Nadyšoŭ čas samastojnaj pracy. Treba było vykanać 40 zakazaŭ. Vyvodzić hrošy Lina nie raiła: čym bolš srodkaŭ na bałansie, tym vyšejšaja kamisija.
Lena ŭziała ŭ kampaniju siastru Kaciu, i dziaŭčaty pačali. Praź niekalki zakazaŭ (ź nieabchodnych 40) uspłyło niešta niezvyčajnaje: «Sumiesnaja zadača». Sumieščany zakaz z troch častak — pieršaja kaštuje $200.
— Jana mnie piša: «O, tabie pašancavała, u sumiesnych zadačach pracent vysoki — vykonvaj abaviazkova. Niama hrošaj? Nu jak tak… Papoŭni, ty ž bačyła, što ŭsio pracuje, vyvodzicca, usio nadziejna! Psichołahi!
Druhaja častka — $500. Zabrać $200 užo nielha, tolki napierad. Treciaja častka — $2000.
— U mianie pačynajuć treścisia ruki. Biahu, zdymaju, kładu na rachunak. Zastałosia jašče 22 zamovy. Prachodzić niekalki zvyčajnych — znoŭ «trajny», užo na tysiačy.
Lena napisała ŭ techpadtrymku. Tam supakoili: maŭlaŭ, nie chvalujciesia, inakš vy nie zmožacie zabrać svaje hrošy. Čamu my nie papiaredzili? A vy nie pytalisia.
— My pazyčyli ŭ siabroŭ. U vyniku dabralisia da 39 zakazaŭ z 40. I 40-j — novaja sumiesnaja kupla. U ahulnaj składanaści my pieraviali $14 tys. Zrabili apošnija zamovy, naciskajem na knopku «Vyvieści hrošy» — admoŭlena.
Techpadtrymka patłumačyła heta tak: zanadta doŭha źbirali hrošy dla apošniaj zamovy, tamu dla razmarozki treba zapłacić jašče $4600. Voś tut usia drama pierapiski.
Paśla hetaha vočy raspluščylisia. I tut ža zakrylisia ad śloz.
— Dalej z nami staŭ havaryć robat. My pradali mašynu, kab nie psavać adnosiny ź siabrami i addać daŭhi. Było dzika soramna. Try dni jak u tumanie.
Siostry źmirylisia sa strataj: žyvyja-zdarovyja, lažała zanačka, treba było kudyści jaje dzieć — voś i dzieli.
— Ja napisała ŭ Instagram, Google, Mininfarm, milicyju, na biržu — kab jany zabłakavali ašukancaŭ. Znajšła kuču paciarpiełych pa ŭsim śviecie. Va ŭsich adno pytańnie — jak viarnuć hrošy. I źviartajusia da ŭsich — budźcie ŭvažlivyja, nie hublajcie hrošy!
PS Jak viarnuć vykradzienyja ašukancami hrošy
— Ubiła ŭ pošukavik niešta nakštałt «jak viarnuć vykradzienaje ašukancami», i chutka rekłama padkinuła mnie kampaniju, jakaja abiacaje dapamahčy. Pakinuła svoj numar telefona, mnie pieratelefanavała dziaŭčyna.
Niby pradbačačy ŭsiu historyju, jana adrazu zrazumieła, što zdaryłasia. Skazała, što ŭsio vyrašalna: pa numarach telefonaŭ, rehistracyjach staronak i kašalkoŭ, hrašovych pieravodach jany ŭsio znojduć. A kali dastanuć maje hrošy, dyk pakinuć sabie 15% ad sumy. Biasprojhryšna. Ale nie. Potym jana dadaje: «U nas buduć nievialikija vydatki na daviedki, listy i rasśledavańnie — $200-300, ich treba budzie apłacić avansam».
Lena pakłała trubku.
Machlary durać ludziej, «pradajučy» meblu praź instahram
Pierajezd ź Biełarusi ŭ Polšču: jak nie narvacca na ašukancaŭ
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć
