Pakiet, što atrymała pasolstva ŭ Ispanii. Fota: «Jeŭrapiejskaja praŭda»
Pa danych palicyi Ispanii, novyja pakiety byli adpraŭlenyja ŭ pasolstva Ukrainy ŭ Madrydzie, a taksama konsulstvy ŭ Barsiełonie i Małazie, ale supracoŭniki słužby biaśpieki pierachapili ich u ofisie nacyjanalnaha paštovaha apieratara krainy.
U kancy minułaha tydnia ab atrymańni pakietaŭ z vačyma žyvioł paviedamlali ŭkrainskija pasolstvy ŭ Vienhryi, Niderłandach, Polščy, Charvatyi, Italii, Čechii i Ispanii.
Kiraŭnik MZS Ukrainy Dźmitryj Kuleba nazvaŭ hetyja listy «spłanavanaj kampanijaj teroru i zapałochvańnia pasolstvaŭ i konsulstvaŭ».
Listy z vybuchoŭkaj
Pasyłkam z vačyma žyvioł papiaredničali banderoli z vybuchoŭkaj, vyjaŭlenyja siłami biaśpieki Ispanii ŭ karespandencyi dla niekalkich kampanij i arhanizacyj. U ich liku byŭ i list z bombaj, adpraŭleny na imia premjer-ministra Ispanii Pedra Sančesa.
30 listapada adna z zaminiravanych banderolaŭ uzarvałasia ŭ dvary budynka ambasady Ukrainy ŭ Madrydzie. Tady paciarpieŭ jaho supracoŭnik, jaki adkryŭ pasyłku.
Pakul viadoma ab šaści banderolach z vybuchoŭkaj:
24 listapada — vyjaŭleńnie vybuchoŭki ŭ liście na imia premjer-ministra Pedra Sančesa (raspaviali pra heta tolki 1 śniežnia);
30 listapada — vybuch u ambasadzie Ukrainy ŭ Madrydzie, pierachop listoŭ z vybuchoŭkaj u kampanii Instalaza, jakaja vyrablaje zbroju, na paŭnočnym uschodzie Ispanii;
1 śniežnia — adrazu try bomby: na avijabazie Tarechon-de-Ardas pad Madrydam, u ispanskim Ministerstvie abarony i ambasadzie ZŠA.
U subotu ispanskaja palicyja paviedamiła, što ŭsie šeść listoŭ z bombami, miarkujučy pa najaŭnaj infarmacyi, byli adpraŭlenyja z horada Valjadalid na paŭnočnym zachadzie Ispanii.
MZS Ukrainy vykazaŭ zdahadku, što ludzi pieraśledvali adnu metu. «Nie budučy zdolnymi spynić Ukrainu, nas sprabujuć zapałochać na dypłamatyčnym froncie. Mahu adrazu skazać, što sproby marnyja. My i dalej budziem efiektyŭna pracavać na pieramohu Ukrainy», — skazaŭ na minułym tydni ministr zamiežnych spraŭ Ukrainy Dźmitryj Kuleba.
Na minułym tydni nieviadomyja taksama zapeckali ekskremientami dźviery kvatery ŭkrainskaha pasła ŭ Vatykanie. A pasolstva Ukrainy ŭ Kazachstanie atrymała łžyvaje paviedamleńnie ab miniravańni, paviedamiŭ śpikier MZS krainy Aleh Nikolenka.
Novyja pasyłki z vačyma žyvioł u paniadziełak vyjavili supracoŭniki słužby biaśpieki paštovaha apieratara Ispanii, jakija paviedamili pra heta palicyi. Pa słovach krynicy ahienctva Reuters, palicyjanty nie znajšli ŭ pasyłcy vybuchovych rečyvaŭ.
Pa słovach Nikolenki, razam z zatrymanymi ŭ paniadziełak tryma pasyłkami ŭsiaho MZS Ukrainy viadoma ŭžo ab 21 sprobie adpravić padobnyja listy abo banderoli.
