Sota
Ab zaviadzieńni kryminalnaj spravy suprać 61-hadovaha mužčyny stała viadoma 14 lipienia. Na nastupny dzień sud adpraviŭ jaho ŭ SIZA. 20 śniežnia na pasiadžeńni Vałahodskaha haradskoha suda prakuror zapytaŭ dla Rumiancava šeść hadoŭ kałonii.
Padstavaj dla kryminalnaj spravy stali dopisy Rumiancava ŭ sacsietkach, a taksama toje, što mužčyna praz svajo amatarskaje radyjo raspaŭsiudžvaŭ infarmacyju pra vajnu va Ukrainie.
Prajekt «Pryvitańnie, ty zamiežny ahient», jaki stvaryli pryznanyja «zamiežnymi ahientami» žurnalistki Sonia Hrojsman i Volha Čurakova, nazyvaŭ Rumiancava amataram muzyki, krajaznaŭcam i aŭtaram videabłoha «Vavan miedyja». Mužčyna 20 hadoŭ pracavaŭ kačaharam na miascovym stankazavodzie, a paśla jaho zakryćcia — kanduktaram u haradskim tralejbusie.
Jaho padpolnaja radyjostancyja pracavała ź pieradatčykami, nabytymi na AliExpress. Jon stvaryŭ jaje jašče vosiem hadoŭ tamu i rehularna vychodziŭ u efir — staviŭ u asnoŭnym savieckija chity. Paśla pačatku vajny Rumiancaŭ pačaŭ nadavać bolš uvahi palityčnym temam. Uletku jon staŭ pieršym u horadzie abvinavačanym pa artykule ab «fejkach» pra rasijskuju armiju.
Vinu ŭ raspaŭsiudzie «vajennych fejkaŭ» Rumiancaŭ nie pryznaŭ. Ci byli ŭ jaho radyjostancyi słuchačy i jak šmat, nieviadoma.
Pa artykule ab raspaŭsiudzie «vajennych fejkaŭ» pa matyvach palityčnaj nianaviści, pa jakim abvinavacili Rumiancava, praduhledžana pakarańnie da 10 hadoŭ pazbaŭleńnia voli.
Realnyja terminy pa hetym artykule raniej atrymali deputat municypalnaj akruhi Krasnasielskaja Alaksiej Horyn (siem hadoŭ kałonii) i pryznany zamiežnym ahientam palityk Illa Jašyn (vosiem z pałovaj hadoŭ).
