Palicyja hrafstva Łankašyr na paŭnočnym zachadzie Anhlii zajaviła, što vypisała štraf «42-hadovamu mužčynu z Łondana».
Štraf za niepryšpileny remień biaśpieki ŭ aŭtamabili, jaki ruchajecca, — 100 funtaŭ. Jon moža ŭzraści da 500 funtaŭ u vypadku, kali parušalnik źvierniecca ŭ sud, ale budzie pryznany vinavatym.
U zajavie Daŭninh-stryt havorycca, što Sunak «całkam pryznaje svaju pamyłku, prynosić prabačeńni» i zapłacić štraf.
Premjer-ministr, jak śćviardžajecca, adšpiliŭ remień biaśpieki na čas zdymak promarolika ŭ hrafstvie Łankašyr ab prahramie brytanskaha ŭrada pa raźvićci rehijonaŭ.
Heta druhi štraf Sunaka za čas jaho pracy va ŭradzie. U krasaviku minułaha hoda jon byŭ aštrafavany razam z Borysam Džonsanam i jaho žonkaj Kery za parušeńnie karancinnych praviłaŭ, uviedzienych na čas pandemii. Havorka idzie pra adnu ź viečarynak na Daŭninh-stryt padčas łakdaŭna: Sunak udzielničaŭ u śviatkavańni dnia narodzinaŭ tahačasnaha premjer-ministra ŭ červieni 2020 hoda.
U partyi libierał-demakrataŭ užo zajavili, što, staŭšy druhim premjeram u historyi, aštrafavanym palicyjaj, Sunak «prademanstravaŭ takuju ž niepavahu da praviłaŭ, jak i Borys Džonsan».
«Jany pavodziać siabie tak, byccam dla ich zakon adzin, a dla astatnich inšy, ale hety štraf — znak taho, što kansiervatary ŭ vyniku paniasuć zasłužanaje pakarańnie», — skazała lidar partyi Dejzi Kupier.
U partyi lejbarystaŭ zajavili, što skandał sa zdymkami pieratvaryŭ premjer-ministra ŭ «paśmiešyšča».
Raniej deputat parłamienta ad Kansiervatyŭnaj partyi (jaje ŭznačalvaje Sunak) Saŭt Bientan vykazaŭ zdahadku, što palicyja Łankašyra daremna marnuje svoj čas, rasśledujučy incydent.
«Pieravažnaja bolšaść ludziej padumała b, što palityčna matyvavanyja skarhi na ramiani biaśpieki — heta nieefiektyŭnaje vykarystańnie resursaŭ», — skazaŭ jon.
