Fota: «Minskaja praŭda»
«Pieršy zahinuły na pratestach, Tarajkoŭski, staŭ jak chałodny duš. Heta krychu nas aćvieraziła. Ale ŭ emacyjnym płanie ŭsie byli spustošanyja. Nichto nie viedaŭ, što rabić dalej. I tady na Kamaroŭskim rynku, niedzie 12 čysła, zjavilisia dziaŭčaty z kvietkami. Heta dało nam nadzieju, što vyniki vybaraŭ mohuć być pierahledžanyja», — pryvodzić słovy Ramana Pratasieviča «Minskaja praŭda».
Pavodle vydańnia, maršruty niadzielnych maršaŭ Pratasievič, ź jaho słoŭ, abmiarkoŭvaŭ z błohieram Eduardam Palčysam. Paśla taho jak Palčysa zatrymali, maršrutami, ich časam i anonsami zajmaŭsia sam Pratasievič.
Ad płanavańnia žanočych subotnich maršaŭ, maršaŭ piensijanieraŭ Pratasievič adchryściŭsia. Ale zaŭvažyŭ, što, na jaho dumku, žanočymi maršami zajmałasia palitołah Valeryja Kaściuhova, pišuć prapahandysty.
Vierahodna, chtości pabłytaŭ imia, bo raniej pra ŭdzieł u arhanizacyi maršaŭ raskazvała dačka palitołaha — Nastaśsia Kaściuhova.
Skrynšot artykuła
Potym adnosiny ŭ Ramana sa Ściapanam pačali horšać. U siaredzinie kastryčnika 2020 hoda Pratasievič pierajechaŭ u Vilniu.
— U Puciły pačalisia niejkija kantakty z Alesiem Zarambiukom — kiraŭnikom Biełaruskaha doma ŭ Varšavie, niejkija hranty jany atrymlivali, da pryniaćcia rašeńniaŭ jon mianie bolš nie padklučaŭ, — skazaŭ Pratasievič.
Siarhiej Cichanoŭski pieršapačatkova źbiantežyŭ Pratasieviča, piša «Minskaja praŭda», bo toj nibyta «raźjazdžaŭ na aŭtamabili z rasijskimi numarami».
Štab Viktara Babaryki Raman viedaŭ, ale nie razmaŭlaŭ ź imi. Ni z Maryjaj Kaleśnikavaj, ni z Maksimam Znakam Pratasievič asabista nie byŭ znajomy.
U zale suda abjaŭleny pierapynak.
Błohier Eduard Palčys u śniežni 2021 hoda byŭ asudžany da 13 hadoŭ źniavoleńnia pa čatyroch artykułach KK za tak zvanaje raspalvańnie varožaści; arhanizacyju masavych biesparadkaŭ; arhanizacyju dziejańniaŭ, jakija parušajuć hramadski paradak; zakliki da dziejańniaŭ, nakiravanych na škodu nacyjanalnaj biaśpiecy.
Palitołaha Valeryju Kaściuhovu 6 lutaha pačali sudzić u Minharsudzie.
