Što pahladzieć. «Noli» (Nolly) — historyja lehiendy brytanskaha TB

Fota: kadr z aficyjnaha trejlera

Brytancy dobra viedajuć sieryjał «Skryžavańni», što vychodziŭ na telebačańni z 1964 ažno da 1988 hoda. Jaho zorkaj była aktrysa Noel Hordan, dla siabroŭ Noli, i ŭsio hetaje šou stała dla hledačoŭ čymści, čym dla amierykancaŭ była «Santa-Barbara». Ciapier Noli razam sa svajoj spadčynaj zastałasia ŭ minułym, ale sieryjał ad viadomaha pradziusara Rasieła C. Devisa viartaje jaje da žyćcia, piša dailymail.co.uk.

Noel była jarkim čałaviekam, i ŭ sieryjale heta nie chavajecca. U pačatku šou jana nakidvajecca na pradziusara, jaki aburaŭsia tym, što sotni fanataŭ «Skryžavańniaŭ» sabralisia pahladzieć na zdymki sceny viasiella ŭ sabory. Jana prynižaje jaho na vačach usioj zdymačnaj hrupy. «Prablema ŭ tabie. Kali 10 tysiač čałaviek pryjšli, kab pakazać svaju luboŭ, to ja dumaju, što heta cudoŭna», — kaža hierainia.

«Skryžavańni» byli adnoj z najpapularniejšych pieradač u historyi brytanskaha telebačańnia, ale i joj dastavałasia ad krytykaŭ. U 1968 hodzie sieryjał navat sprabavali zakryć, ale hramadskaść uzbuntavałasia, i abureńnie ŭznačaliła žonka premjer-ministra. Suprać takoha nie pojdzieš.

Tady sieryjał vyžyŭ, ale praz 13 hadoŭ Noli daviałosia jaho pakinuć, i ništo nie zmahło jaje vyratavać. U toj čas prajaviłasia jaje ŭraźlivaść, što tak doŭha chavałasia za bieskampramisnym fasadam Noli, ale tady prajavilisia i novyja hrani jaje akciorskaha talentu, bo Hordan zaźziała na teatralnaj scenie.

Noli pamierła ad raku straŭnika ŭ 1985 hodzie, što pakłała kaniec usim spadziavańniam viarnuć jaje. I samo žyćcio hetaj žančyny, i jaje karjera zakančvajucca zanadta rana, dy i sam sieryjał miescami vyhladaje śpiešna, nibyta Devis chacieŭ raskazać zanadta šmat dla troch sieryj. Tym nie mienš, heta ŭsio jašče adzin ź jaho kłasičnych majstar-kłasaŭ pra sapraŭdnuju ščyraść, u tym liku i ŭ samych važnych rečach.

Voś čamu hledačy nadoŭha zapomniać «Noli», i ŭ niejkim sensie heta budzie prajavaj spraviadlivaści da losu samoj Noel Hordan. Niekali jaje vykraślili sa «Skryžavańniaŭ», adkinuli najdalej i zabylisia. Ciapier novaja kinadrama pra Noli viartaje telezorku minułaha na ekrany Brytanii dy i va ŭsim śviecie — napeŭna, sapraŭdnaj Noli hetaha vielmi chaciełasia b.

Narešcie, hety sieryjał — pryznańnie Rasieła T. Devisa ŭ kachańni nie tolki da spadaryni Hordan, ale i da kožnaj žančyny jaje ŭzrostu, jakuju dahetul nazyvajuć «składanaj» prosta za toje, što jana viedaje, čaho choča, i ličać zanadta ambicyjoznaj, kali jana prajaŭlaje ŭ žyćci napor. Dziejańnie sieryjała «Noli» adbyvajecca ŭ 80-ja hady, ale, jak pakazvaje žyćcio, hety sieryjał pa-raniejšamu aktualny.