2 listapada Hlen Chenłan padčas razmovy z staršyniom fiederacyi chakieja Uładzimiram Navumavym ahučyŭ rašeńnie spynić supracoŭnictva z nacyjanalnaj zbornaj Biełarusi. Taki krok byŭ matyvavany kiepskim maralna‑psichałahičnym stanam.
«Paśla doŭhich i hruntoŭnych rozdumaŭ, ja pryjšoŭ da vysnovy, što dla kamandy i jaje vynikaŭ budzie lepš, kali ja sydu. Chaču asobna adździakavać Uładzimira Uładzimiraviča (Navumava — «NN») za mahčymaść uznačalvać biełaruskuju zbornuju na praciahu niekalkich hadoŭ. Ja vieru ŭ budučyniu biełaruskaha chakieju i ščyra zyču pośpiechu vašaj kamandzie na Alimpijadzie i čempijanacie śvietu», — pryvodzić słovy Chenłana fiederacyja chakieju.
U Biełarusi ekstravahantny kanadziec źjaviŭsia zimoj 2005 hodu,kali zbornaja pravaliła ryžskuju kvalifikacyju da Alimpijady‑2006. Stary hałoŭny trenier Michaił Zacharaŭ byŭ zvolnieny z pasady, a jahonaje miesca vyrašyli davieryć paŭnočnaamierykancu.
Na toj momant Hlen nie źjaŭlaŭsia biespracoŭnym. Jon uznačalvaŭ kłub Nacyjanalnaj chakiejnaj lihi (najmacniejšaj u śviecie) «Vašynhton Kepitałs». Ale mienavita ŭ toj siezon za akijanam hulcy abviaścili łakaut, i Chenłan vyrašyŭ siabie pazabavić pracaj sa zbornaj.
U Biełarusi da kanadca adnieślisia z naściarožanaściu. Kolki krytyki było na śpiecyjalista, kali jon admaŭlaŭsia vyklikać u zbornuju najlepšaha na toj momant bambardzira nacyjanalnaha čempijanatu Siarhieja Šytkoŭskaha, ci kazaŭ sa słovaŭ trecich asobaŭ pra kiepski charaktar Alaksieja Kalužnaha. Usie śmiajalisia z «trojki zajcaŭ», što ŭvioŭ Hlen, — samych chutkich hulcoŭ, jakija byli zdolnyja zadać matču patrebny temp. Ale Chenłan zmoh pierakanać usich piesimistaŭ.
Na pieršym suśvietnym pieršynstvie biełarusy pad kiraŭnictvam Chenłana byli dziesiatymi, a ŭžo praz hod u Ryzie dasiahnuli najbolšaha pośpiechu ŭ svajoj historyi — šostaje miesca.
Toj hod Chenłanu pierapadała jašče bolš, bo jon asnoŭnuju častku siezona kiravaŭ kamandaj z‑za akijanu. Tym nie mienš, hulcy adznačali, što dziakujučy trenieru ŭ kalektyvie ŭtvaryłasia vydatnaja pryjaznaja atmaśfiera. Skažam, pierad adkaznymi hulniami jon vadziŭ chakieistaŭ u cyrk ci na piejntboł.
U 2006‑ym Chenłana nazvali čałaviekam hodu pavodle viersii haziety «Priessboł».
Potym dva hady kamandaj kiravaŭ amierykaniec Kurt Frejzier, a Chenłan jamu dapamahaŭ čym moh, ale na čempijanacie śvietu ŭ Kanadzie ŭ 2008 hodzie, u niekalkich momantach Hlen, plavaŭ subardynacyju, chapaŭsia za trenierski płanšet i pačynaŭ tłumačyć hulcam, što treba rabić.
Navumavu atrymałasia ŭhavaryć kanadca ŭznačalić zbornuju znoŭ.
Sioleta ŭ Šviejcaryi kamanda pad kiraŭnictvam paŭnočnaamierykanca zhulała dobra, atrymaŭšy pieramohi nad mocnymi słavakami i finami, i tolki ŭ adnu šajbu prajhrali budučym čempijonam z Rasii. Za Chenłanam ustojliva pryčapiłasia mianuška «ščaśliviec».
Paśla hetaha kanadziec pryniaŭ rašeńnie pryniać minskaje «Dynama», što zmahajecca ŭ KCHŁ. Ale paśla šerahu parazaŭ, 20 kastryčnika nastaŭnika adpravili ŭ adstaŭku. Kažuć, što za joj moh stajać hałoŭny chakiejny balelščyk krainy.
Užo na hetym tydni ŭ Babrujsku i Žłobinie projdzie tradycyjny Kubak Paleśsia, pakul niajasna, chto budzie kiravać zbornaj.
Tym nie mienš, možna mierkavać, što epocha zaakijanskich śpiecyjalistaŭ u Biełarusi skončyłasia. Što ž, Chenłan zasłužyŭ dobruju pamiać pa sabie. Byvaj, Hlen!
***
Hlen Chenłan naradziŭsia ŭ 1957 hodzie ŭ Brendanie (Kanada). Varatar. U NCHŁ vystupaŭ za «Vankuvier Kenaks», «Sent‑Łuis Bluz», «Ńju‑Jork Rejndžers», «Detrojt Red Uinhs». Mienavita ŭ varoty, što achoŭvaŭ Chenłan, svaju pieršuju šajbu ŭ NCHŁ zakinuŭ lehiendarny Uejn Hrecki. U 2003—2007 hadach zanimaŭ pasadu hałoŭnaha treniera «Vašynhton Kepitałs». Zbornuju Biełarusi ŭznačalvaŭ na čempijanatach śvietu 2005, 2006, 2009. Treniravaŭ minskaje «Dynama».
