Pad kaniec dnia 30 červienia, za niekalki hadzin da ŭviadzieńnia novych, značna bolšych, pošlin na ŭvoz aŭtamabilaŭ, u punktach propusku na miažy Biełarusi z krainami Jeŭrapiejskaha sajuza źnikli čerhi.
Pavodle danych Dziaržaŭnaha pahraničnaha kamiteta, čerhaŭ lehkavych aŭtamabilaŭ na ŭjezd u krainu niama ni na łatvijskim, ni na litoŭskim, ni na polskim napramku. Skaračeńnie liku aŭtatranspartnych srodkaŭ, jakija zajazdžajuć, adznačałasia ranicaj 30 červienia. Ale jašče dniom, naprykład, u «Brest-Ciarespali» («Varšaŭski most») nazirałasia čarha prykładna z 200 aŭtamabilaŭ.
«Usio, što mahło dabracca da miažy, toje dabrałasia, — prakamientavaŭ situacyju pres-sakratar Dziaržpahrankamiteta Alaksandr Ciščanka. — Niekatoryja mašyny złamalisia i nie zmahli dajechać. Jość kantejniery, jakija nie zmahli vyciahnuć z Kłajpiedskaha porta (majucca na ŭvazie kantejniery z mašynami, nabytymi ŭ ZŠA). Kali chtości raźličvaŭ, što na miažy budzie panika, to jaje nie adbyłosia. Padrychtoŭka, jakaja była praviedziena, mieła svoj vynik».
Pavodle słoŭ pres-sakratara pahranviedamstva, kab maksimalna zachavać intaresy ludziej, Dziaržpahrankamitet i Dziaržaŭny mytny kamitet pajšli na biesprecedentnyja miery. U dva-try razy «ŭ paraŭnańni z techničnymi mahčymaściami» była pavialičana prapusknaja zdolnaść punktaŭ propusku. Byli abstalavanyja dadatkovyja punkty afarmleńnia transpartu — na vynasnych stałach pad naviesami. «Paniki nie było. Pamiežniki i mytniki vykanali svaje abaviazki pa maksimumie», — skazaŭ Alaksandr Ciščanka.
Viačasłaŭ Budkievič, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
