Bresckaja žurnalistka, siabra BAŽ Žanna Sidaruk addała premiju "Za aktyŭnuju žurnalisckuju pazicyju», jakuju atrymała ad staršyni abłvykankama Kanstancina Sumara, aktyvistu demsiłaŭ Ivanu Stasiuku.
Maładoha čałavieka zatrymali 14 červienia, napiaredadni akcyi «Revalucyja praz sacyjalnyja sietki», i asudzili na 10 sutak aryštu za drobnaje chulihanstva i niepadparadkavańnie supracoŭnikam milicyi.
U dzień suda 15 červienia Ivana Stasiuka dastavili ŭ RAUS za toje, što jon nibyta niecenzurna łajaŭsia. Napiaredadni ŭ kvatery baćkoŭ Ivana byŭ praviedzieny pieratrus. Padstavaj pasłužyła sprava ab padpale Doma pravasudździa ŭ Minsku. U vyniku ŭ chłopca zabrali kampjutar. Niekalkimi dniami raniej maładoha čałavieka dapytvali ŭ KDB na pradmiet jaho dziejnaści ŭ sacyjalnych sietkach.
- Adnojčy ŭ talenavitaha kałumnista Alaksieja Ćviatkova pračytała, što čałaviek nie moža być svabodnym, kali nie svabodny jaho blizki, tamu što heta nie svaboda, a pryvilej, - kaža Žanna Sidaruk. - Ja hetuju pazicyju padzialaju. Tamu i vyrašyła addać siamji Stasiukoŭ premiju, jakoj mianie 12 maja ŭznaharodziŭ staršynia Bresckaha abłvykankama Kanstancin Sumar z farmuloŭkaj "Za aktyŭnuju žurnalisckuju pazicyju». Zaŭvažu, što hrošy atrymała tolki ŭ druhoj pałovie červienia. Dzie jany hulali ŭ pieryjad aktyŭnaj devalvacyi - zahadka.
Chaj mama Vani kupić jamu vitaminaŭ albo apłacić pasłuhi advakata, abo zbor za ŭtrymańnie syna ŭ IČU.
Jaho ž tam navat pakarmić nie znajšli čas paśla zatrymańnia. 44 hadziny biez sucharyka abo buterbrodzika - ja b naŭrad ci vytrymała biez skandału i nieprytomnaściaŭ.
Ź Ivanam Stasiukom žurnalistka Žanna nie znajomaja asabista, ale vielmi choča heta vypravić.
- Bo mnie zdajecca, što takija ludzi, jak Vania, - apošnija ź plejady ramantykaŭ, ludzi źnikajučaha vidu «Danka», - dzielicca Žanna Sidaruk. - Ja razmaŭlała ź jaho mamaj. Ja b maryła, kab maja mama tak adčajna i ŭparta padtrymlivała mianie ŭ maich pošukach praŭdy i spraviadlivaści.
