Ministerstva finansaŭ Biełarusi čakaje adnaŭleńnia kredytnaha supracoŭnictva ź Mižnarodnym valutnym fondam i ličyć mahčymym pryciahnieńnie z fondu novych kredytnych resursaŭ.Pra heta karespandentu BiełTA paviedamiŭ ministr finansaŭ Biełarusi Andrej Charkaviec.
Pavodle słovaŭ ministra, prahrama refarmavańnia biełaruskaj ekanomiki, vykanańnie jakoj nieabchodnaje dla praciahu kredytnaha supracoŭnictva z MVF, pa bolšaści pazicyj supadaje z prahramaj refarmavańnia, jakuju Biełaruś uzhadniła z Antykryzisnym fondam JeŭrAzES. «My ŭžo pravodzim strukturnyja reformy ekanomiki, nie čakajučy prahramy z MVF, — padkreśliŭ kiraŭnik Minfina. — Siońnia łamać jaje niama nijakaha sensu, bo my pabudavali svaje płany ŭ ramkach taho, pra što damovilisia z Antykryzisnym fondam JeŭrAzES».
Andrej Charkaviec adznačyŭ, što MVF čakaje bolš hłybokich dziejańniaŭ urada pa karektavańni makraekanamičnaj palityki. Adnak hetyja dziejańni mohuć pryvieści da sacyjalnych vydatkaŭ i ekanamičnych strat. «Pytańnie ŭ tym, što my miakčej pravodzim hetuju palityku, naturalna, daŭžej ŭ časie, ale ź mienšymi sacyjalnymi vydatkami, — skazaŭ ministr. — I tut havorka pavinnaja iści pra kampramis — ich pazicyi i našaj pazicyi. U nas jość padstavy havaryć pra toje, kab fond prymaŭ pad uvahu nie tolki čysta fiskalnyja, makraekanamičnyja mety, ale i sacyjalnuju praktyku ŭ krainie».
Na dumku kiraŭnika Minfina, tyja miery, jakija ŭžo prymajucca ŭ Biełarusi pa refarmavańni ekanomiki, možna nazvać davoli žorstkimi. Da prykładu, prahrama reformaŭ praduhledžvaje rašeńnie Nacbanka pa abmiežavańni emisijnaha kredytavańnia ekanomiki. «Z 1 červienia Nacbank naohuł spyniŭ u krainie takoje kredytavańnie i ŭsie pytańni, źviazanyja z padtrymkaj dziaržaŭnych prahram, uziaŭ na siabie ŭrad, — nahadaŭ jon. — My finansujem hetyja prahramy za košt tych reštkaŭ srodkaŭ, jakija biudžet nazapasiŭ za minułyja hady. I, biezumoŭna, my skarocim abjom takoha kredytavańnia ŭ paraŭnańni ź minułym hodam».
Jašče adno patrabavańnie mižnarodnych ekśpiertaŭ — kab biudžet byŭ ź minimalnym deficytam. «Pakul my vykonvajem jaho z praficytam, — kanstatavaŭ Andrej Charkaviec. — Kali za piać miesiacaŭ hetaha hoda respublikanski biudžet byŭ z praficytam kala Br500 młrd, to za šeść miesiacaŭ my dabilisia ŭžo amal Br1 trłn». Pavodle słovaŭ ministra, u Biełarusi strymlivajucca vydatki, nazapašvajucca resursy dla taho, kab u druhim paŭhodździ nakiravać ich na sacyjalnuju abaronu hramadzian, na pakryćcio apłaty kamunalnych pasłuh. «Na ich paŭpłyvaje źmianieńnie kursu nacyjanalnaj valuty, bo heta ŭsio pakupnaja enierhija — haz, nafta, — skazaŭ surazmoŭca.- U hetym płanie biudžet strukturna mianiajecca».
Adkazvajučy na pytańnie pra pamiery kredyt, pra jaki Biełaruś płanuje vieści pieramovy z MVF, Andrej Charkaviec adznačyŭ, što hety abjom budzie vyznačacca zychodziačy z patrebnaści finansavańnia deficytu rachunku biahučych apieracyj. A jon u svaju čarhu vyznačycca z ulikam taho, jakimi tempami budzie raźvivacca ekanomika ŭ druhim paŭhodździ, nakolki skarocicca impart i vyraście ekspart.
Ministr dadaŭ, što ŭ cełym pazityŭna aceńvaje pierśpiektyvy kredytnaha supracoŭnictva z MVF. «Heta narmalna, kali my vykonvajem u siabie tyja dziejańni, jakija prapisvaje MVF. Čamu b nie zadacca pytańniem pra toje, kab MVF paŭdzielničaŭ u padtrymcy biełaruskaj ekanomiki?» — reziumavaŭ Charkaviec.
