Deputaty pałaty pradstaŭnikoŭ 2 krasavika pryniali ŭ pieršym čytańni papraŭki ŭ niekatoryja zakony pa pytańniach transpłantacyi orhanaŭ i tkanak čałavieka.
Jak paviedamiŭ ministr achovy zdaroŭja Vasil Žarko, dziejny zakon ab transpłantacyi orhanaŭ «istotna pašyryŭ mahčymaści transpłantałahičnaj dapamohi nasielnictvu». Razam z tym, dadaŭ jon, u dakumiencie «niedastatkova poŭna i jasna zamacavany miechanizm zaboru orhanaŭ i tkanak u trupnych donaraŭ».
Žarko zaznačyŭ, što kožny hramadzianin pry žyćci maje prava na napisańnie zajavy ab niazhodzie na zabor u jaho orhanaŭ i tkanak paśla śmierci. Adnak, zychodziačy z pałažeńniaŭ zakona, nie zusim jasna, ci akumulujucca takija zajavy ŭ adzinuju bazu, ci isnujuć mahčymaści apieratyŭnaha daniasieńnia da kiraŭnikoŭ arhanizacyj achovy zdaroŭja pra takija zajavy hramadzian.
U suviazi z hetym papraŭki praduhledžvajuć stvareńnie adzinaha rehistra transpłantacyi ź infarmacyjaj pra asob, jakija napisali zajavu ab niazhodzie na zabor tkanak i orhanaŭ pry nastupleńni śmierci.
«Stvareńnie adzinaha rehistra dazvolić ažyćciaŭlać kantrol za vykarystańniem orhanaŭ i tkanak čałavieka, a taksama zabiaśpiečyć apieratyŭnaje akazańnie miedycynskaj dapamohi asobam, jakija majuć patrebu ŭ transpłantacyi», — skazaŭ Žarko.
Ministr achovy zdaroŭja taksama paviedamiŭ, što ŭ 2011 hodzie ŭ krainie było vykanana 175 transpłantacyj nyrki, 43 — piečani, 21 — serca, a za try miesiacy hetaha hoda vykanana 51 transpłantacyja nyrki, 7 — serca, 13 — piečani.
