«Kali-niebudź my daviedajemsia ŭsiu praŭdu ab terakcie ŭ minskim mietro», — zajaviła maci rasstralanaha Uładzisłava Kavalova Luboŭ Kavalova paśla prezientacyi filma telekanała «Biełsat» «Strach u krainie spakoju», pryśviečanaha teraktu 11 krasavika 2011 hoda. Prezientacyja prajšła 10 krasavika ŭ ofisie ruchu «Za Svabodu».
Pavodle słoŭ žančyny, takija filmy pavinny demanstravacca pa dziaržaŭnym telebačańni, kab «pakazać usiu praŭdu, pakazać toje, što abvinavačańnie tak i nie zmahło dakazać vinu Kanavałava i Kavalova». «Navat paśla śmierci chłopcaŭ takija filmy nieabchodnyja», — adznačyła jana.
«Ja viedaju, što vialikaja kolkaść ludziej nie vierać u aficyjnuju viersiju ŭłady, nie vierać u vinavataść Kanavałava i majho syna. Ułada sprabuje dakazać ich vinu pierakanańniami, a nie dokazami. I ŭsio adno ludzi ŭ heta nie vierać»,— skazała Luboŭ Kavalova.
Jana adznačyła, što ŭ filmie pryviedziena «tolki krychu dokazaŭ i sprečnych momantaŭ u spravie Kanavałava i Kavalova». «U hetym filmie sabranyja tolki videadokazy. U im niama inšych dokazaŭ i sprečnych momantaŭ. Naprykład, čamu adbitki palcaŭ Kanavałava trapili ŭ bazu danych MUS tolki praz dva dni paśla teraktu ŭ minskim mietro? Na jakich padstavach tady supracoŭniki śpiecsłužb aryštavali majho syna i Kanavałava, kali jaho adbitkaŭ palcaŭ u bazie danych na toj momant nie było? Čamu videazdymka kamier nazirańnia mietro była zmanciravana? Takich pytańniaŭ šmat», — skazała Kavalova.
Pavodle jaje słoŭ, tyja ž pytańni zadajuć i paciarpiełyja padčas terakta.
***
Vybuch na stancyi «Kastryčnickaja» adbyŭsia 11 krasavika 2011 hoda ŭ 17.56. U vyniku terakta 15 čałaviek zahinuli, ciažkija cialesnyja paškodžańni atrymali 32, mienš ciažkija — 72, inšyja cialesnyja paškodžańni — 283 čałavieki.
30 listapada 2011 hoda Viarchoŭny sud pryznaŭ
Pryhavory ŭ dačynieńni da maładych ludziej byli pryviedzienyja ŭ vykanańnie prykładna ŭ siaredzinie sakavika, niahledziačy na toje što skarha Kavalova na pryhavor była zarehistravanaja ŭ Kamitecie AAN pa pravach čałavieka. U Viarchoŭnym sudzie taksama nie była razhledžana nahladnaja skarha na śmiarotny pryhavor.
