Na pazačarhovym schodzie akcyjanieraŭ SAAT «Kamunarka» 26 kastryčnika ŭ Minsku pryniata rašeńnie ab pavieličeńni doli dziaržavy da krychu bolš jak 57%.
Pavodle słoŭ surazmoŭcy, pryniata adstaŭka raniejšaha składu naziralnaha savieta i vybrany novy. Abnaŭleńnie skłała 100%. Schod akcyjanieraŭ zaćvierdziŭ na pasadzie hienieralnaha dyrektara pradpryjemstva byłoha staršyniu kancerna «Biełdziaržcharčpram» Ivana Dančanki.
Jak paviedamlałasia raniej, 12 kastryčnika na naradzie pa pytańniach raźvićcia kandytarskaj haliny Alaksandr Łukašenka daručyŭ likvidavać na pradpryjemstvach «Kamunarka» i «Spartak» i pavialičyć dolu dziaržavy da 57% — na «Kamunarcy» i da 60% — na «Spartaku».U adkrytyja akcyjaniernyja tavarystvy abiedźvie fabryki byli pieraŭtvorany ŭ 1994 hodzie. Paśla akcyjanavańnia 49% akcyj «Kamunarki» stali naležać fizičnym asobam, 51% — jurydyčnym (22% — dola dziaržavy, 22,5% — amierykanskaj kampanii «Moł Karparejšn»). Trymalnikam kantrolnych pakietaŭ akcyj abiedźviuch fabryk byŭ amierykanski biźniesmien biełaruskaha pachodžańnia Marat Novikaŭ.
«Narodnaje pavinna pracavać. Kali pryjšoŭ pryvatnik i nie pracuje — značyć pradpryjemstva, pakul jano nie źniščana, treba viarnuć narodu», — zajaviŭ Łukašenka na naradzie.
Dziarždola ŭ abodvuch AAT budzie pavialičana praz dadatkovuju emisiju akcyj, biazvypłatna pieradadzienych dziaržavie. Jurydyčnaj padstavaj dla inicyjavańnia kancernam «Biełdziarcharčpram» praviadzieńnia dadatkovaj emisii stała rašeńnie Vyšejšaha haspadarčaha suda, jaki jašče ŭ žniŭni hetaha hoda ŭstanaviŭ, što dziarždola ŭ AAT «Kamunarka» i AAT «Spartak» u svoj čas była zanižana.
