Biełaruś prapanuje Kitaju kupić adzin z bankaŭ

Ab hetym zajaviŭ u aŭtorak prem'jer-ministr Biełarusi Michaił Miaśnikovič na sustrečy z namieśnikam ministra kamiercyi Kitaja Czian Jaapinam.

«My mahli b akazać sadziejničańnie ŭ rehistracyi kitajskaha banka ŭ Biełarusi ci vyrašyć pytańnie, kab pradać adzin ź biełaruskich bankaŭ abo jaho peŭny pakiet akcyj kitajskim kamiercyjnym bankam», — skazaŭ Michaił Miaśnikovič.

Hetyja hrošy mahli b aktyŭna pracavać u Biełarusi, asabliva ŭ Kitajska-biełaruskim industryjalnym parku, padkreśliŭ prem'jer-ministr.

U cełym ža, adznačyŭ kiraŭnik urada, Biełaruś i Kitaj vychodziać na novy ŭzrovień supracoŭnictva — inviestycyjny. U suviazi z hetym Biełaruś zacikaŭlena, kab kitajskija banki bolš aktyŭna prychodzili na biełaruski rynak. «Dyviersifikacyja kapitału takaja ž važnaja, jak i dyviersifikacyja handlu», — dadaŭ prem'jer-ministr.

Ciapier biełaruska-kitajskaje supracoŭnictva hruntujecca na vialikim pakiecie inviestycyjnych prajektaŭ, ahulny abjom kredytavańnia jakich składaje $16 młrd.

Ad KNR u Biełaruś iduć i pramyja zamiežnyja inviestycyi. Havoračy ab važniejšym prajekcie — Kitajska-biełaruskim industryjalnym parku, Michaił Miaśnikovič padkreśliŭ, što «budzie vielmi dobra, kali ŭ Biełarusi budzie adpaviednaja finansavaja struktura». Jon kanstatavaŭ, što ŭ Biełarusi pryniaty šerah uradavych rašeńniaŭ ab padtrymcy hetaha prajekta, jaho ź vialikimi prefierencyjami dla inviestaraŭ padtrymaŭ i Prezident. Michaił Miaśnikovič vykazaŭ upeŭnienaść, što ŭrad Kitaja taksama padtrymaje hety znakavy ŭnikalny prajekt.

Prem'jer-ministr taksama acaniŭ rehijanalnaje supracoŭnictva z pravincyjami i haradami Kitaja i asabliva padziakavaŭ za heta meru horada Charbina.

Z hetym kitajskim horadam składvajucca dobryja adnosiny. Akramia taho, naraŭnie z handlova-ekanamičnymi suviaziami pamiž Biełaruśsiu i Kitajem ustanaŭlivajecca vysoki ŭzrovień navukova-techničnaha supracoŭnictva. Tut taksama realizujecca šmat sumiesnych prajektaŭ.

Na sustrečy Michaił Miaśnikovič i Czian Jaapin abmierkavali taksama adno važnaje dla Biełarusi pytańnie — strukturu spažyvieckaha kitajskaha impartu.

Prem'jer-ministr Biełarusi prapanavaŭ abmierkavać, jak lepš arhanizavać ekspart kitajskich spažyvieckich tavaraŭ u Biełaruś. «Na žal, vašy tavary iduć u Biełaruś praz šmatlikich pasrednikaŭ, praź inšyja dziaržavy. My mahli b u pryncypie prapanavać krychu inšuju schiemu, jakaja budzie vyhadnaja i vam, i nam», — skazaŭ Michaił Miaśnikovič.

Jon padziakavaŭ uradu Kitaja za techničnuju i humanitarnuju dapamohu Biełarusi pa minimizacyi nastupstvaŭ katastrofy na ČAES. U cełym ža kiraŭnik biełaruskaha ŭrada paśpiachova aceńvaje supracoŭnictva Biełarusi i Kitaja. «Supracoŭnictva ź Vialikim Kitajem źjaŭlajecca pryjarytetam u źniešnieekanamičnaj dziejnaści Biełarusi», — skazaŭ jon.

I važnuju rolu ŭ hetym adyhryvaje sumiesnaja Biełaruska-kitajskaja mižuradavaja kamisija pa handlova-ekanamičnym supracoŭnictvie, 13-je pasiadžeńnie jakoj prajšło ŭ Minsku. «Heta struktura ažyćciaŭlaje vielmi vialikuju rabotu, jana vyrašaje ŭsie pierśpiektyŭnyja i biahučyja pytańni supracoŭnictva, jakija ŭ dalejšym transfarmujucca ŭ rašeńni ŭrada», — skazaŭ Michaił Miaśnikovič.

Namieśnik ministra kamiercyi Kitaja Czian Jaapin, jaki źjaŭlajecca sustaršynioj kitajskaj častki kamisii, taksama padkreśliŭ važnaść raboty hetaj struktury pa ŭmacavańniu handlova-ekanamičnaha supracoŭnictva pamiž dźviuma krainami.

BiełTA

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH