Cikava, jak razumiejuć dzieci vyrazy darosłych palitykaŭ, kštałtu frazy «pakramsali małoha». Jaje skazaŭ u apraŭdańnie prypynieńnia tranślacyi rasijskich kanałaŭ adzin z pradstaŭnikoŭ ajčynnaha palitykumu. Fieljeton Lolika Uškina.
Mały pchnuŭ nahoju plušavaha mišku. Hulać nie chaciełasia navat u chakiej.
Situacyja była poŭnaja žeść. Da małoha dajšli čutki, što jaho kramsajuć na rasijskich kanałach.
Za što — nie moh zrazumieć chłopčyk.
Jon byccam ničoha antyrasijskaha nie kazaŭ. Pastaraŭsia ŭzhadać: mo padpisvaŭ pietycyju za vyzvaleńnie Chadarkoŭskaha, kvasiŭ ź Limonavym abo razam z Kasparavym praryvaŭ łancuhi amonu na maršy niazhodnych? Byccam, nie.
Treba było terminova paraicca z darosłymi.
I tut pačuŭsia znajomy huk prapielera, i ŭ pakoj ulacieŭ Karłsan.
— Vitaju, mały,— skazaŭ jon. — Davaj dureć i kraści pluški ŭ frekien Bok!
— Ach, Karłsan, u mianie prablema, — chłopčyku było nie da žartaŭ. — Mianie kramsajuć na kanałach kštałtu RenTV.
Karłsan pajšoŭ na pasadku.
— Spakojna, tolki spakojna. Ty ž viedaješ, chto samy lepšy ŭ śviecie ekśpiert pa rasijskaj unutranaj palitycy, — zajaviŭ mužčyna ŭ poŭnym roskvicie siłaŭ. Na dumku Karłsana, usio schodzicca na tym, što frekien Bok — sakretny rezident FSB: «My kankretna papali, mały. Hetak jana nastupny raz nam z taboju pałonij u ciefcieli padkładzie».
— I što mnie rabić: prasić u baćkoŭ nie sabaku, a pryznańnie niezaležnaści Paŭdniovaj Asiecii i Abchazii?
— Viedaješ, što: a davaj zaraz da Pucina?
Karłsan z Małym na śpinie lacieli nizka, amal nad chvalami Bałtyki, i radary baranavickaj RŁS nie zmahli zafiksavać parušeńnie pavietranaj miažy sajuznaj dziaržavy.
Dziva što Pucin trochi ašaleŭ, kali ŭ akno jaho kabinietu ŭlacieli bieź vizy hramadzianie krainy zachodniaha błoku.
— Što za bazar? — Karłsan pierajšoŭ na rasijskuju movu. — U natury, nie razumieju najezdu na małoha.
— M-m-m-m-m, dazvolu padzialicca dumkaj, što zaraz usio vyrašym, — VVP padniaŭ słuchaŭku.
Jamu jaŭna nie chaciełasia psavać adnosiny z Šviecyjaj ( kraina — adzin ź lideraŭ zimovych vidaŭ sportu) napiaredadni sočynskaj Alimpijady.
— Alo, dyrekcyja RenTV? Što tam u vas za kampanija suprać małoha? Čamu vy jaho kramsajecie? Patrabuju nie tolki nie kramsać, a naadvarot, u dva razy bolš pavialičać jaho prysutnaść u efiry. I tolki pazityŭnaja padača. Zrazumieli? Voś tak.
Pucin źviarnuŭsia da haściej.
— Usio ŭ ažury. Darečy, Karłsan, nie žadajecie rekłamavać hazapravod «Paŭnočnaja płyń»?
Karłsan uziaŭ vizitku, padchapiŭ małoha i ŭziaŭ kurs na Stakholm.
Nazaŭtra ŭ vypuskach navinaŭ RenTV Dźmitryja Miadźviedzieva pakazali ŭ dva razy bolš, čym zvyčajna.
