Fota: mlyn.by
«Zachodziš u vadu i nastupaješ na dochłuju rybu. Nie samyja pryjemnyja ŭražańni», — dzielacca ludzi.
Dochłaja ryba tut paŭsiul: na bierazie, dzie nad joj užo rajacca muchi, u prybiarežnaj zonie, u zaraśnikach čarotu.
Situacyja asabliva pahoršyłasia ŭ apošnija dva dni, i, viadoma, ludzi pieražyvajuć: «A što, kali kupańnie ŭ hetaj vadzie naniasie škodu i čałavieku?» Tym bolš, što ŭ śpiakotu rezka pavialičvajecca kolkaść vypadkaŭ kišačnych zachvorvańniaŭ.
Doktar-hihijenist Taćciana Sasnoŭskaja, zahadčyca adździeła hihijeny Smalavickaha rajonnaha centra hihijeny i epidemijałohii, raskazała vydańniu, što proby vady z vadaschovišča biaruć rehularna i ciapier jaje jakaść zadavalniajučaja, pahrozy dla zdaroŭja tych, chto kupajecca, niama.
Što tak paŭpłyvała na stan ryby, pakul nieviadoma.
— Sabranuju rybu my adpravili ŭ łabaratoryju — na ekśpiertyzu. Tamu pakul ja nie mahu skazać, što stała pryčynaj takoj situacyi. Skažu tolki, što pa vynikach analizaŭ vady ź jaje nasyčeńniem kisłarodam usio ŭ normie. Inšyja vidy ryb nie ciarpiać. Prablema tolki z karasiom, — kaža načalnik Smalavickaj rajonnaj inśpiekcyi pryrodnych resursaŭ i achovy navakolnaha asiarodździa Vital Astroŭski.
Mor ryby ŭ haračaje nadvorje ŭ adnosna niehłybokich vadajomach nie redkaść. Akazvajecca, kožnamu vidu ryb padychodzić tyja ci inšyja suadnosiny kisłarodu i, naprykład, vuhlakisłaha hazu, jakija traplajuć u vadu z atmaśfiery.
Adny vidy i pry kancentracyi 100 h/ł adčuvajuć siabie narmalna, inšyja nie vytrymlivajuć i 30 h/ł.
Pahibielna dziejničaje na ryb i prysutnaść u vadzie sieravadarodu. Pry kancentracyi ŭsiaho 1 mh/ł ryba nie zdolnaja zasvojvać kisłarod.
Jak raskazali vydańniu vopytnyja rybaki, na hłybokich vadajomach takich situacyj praktyčna nie zdarajecca, a maksimalnaja hłybinia Smalavickaha vadaschovišča — 4 m.
Ale sapraŭdnyja pryčyny moru ryby pakul nieviadomyja.